SAKYANAN sa mayor sa lungsod sa Tudela nakaligis og lalake nga nagkalingaw og text sa karsada sa miaging gabii.

Samtang dumptruck sa usa ka konsehal sa lungsod sa Alcoy nakabangga og 9 anyos.

Sa siyudad sa Toledo, namatay ang angkas sa motorsiklo sa aksidente lang gihapon sa karsada.

Ang unang aksidente nahitabo sa lungsod sa Alcoy, pasado alas 2:00 sa hapon niadtong Biyernes.

Sun.Star accepts donations for victims of Typhoon Ondoy

Usa ka Isuzu mini dump truck (plate no. YBU-976) gimaneho ni Albert Gotalan ug gipanag-iya ni Konsehal Antonio Sestoso sa Alcoy ang nakadasmag sa usa ka Jaycris Inigo, tinun-an sa grade-3 sa Pasol Pugalo Elementary School.

Si Gotalan nga nagkargag graba padung sa Poblacion nakakita pa kang Inigo nga nagbarog kilid sa karsada.

Sa dihang duol na ang sakyanan kalit ang nilabang ang biktima ug nisuway pa unta sa paglikay ang drayber apan naigo gyud ang bata.

Ang bata nasamad ug nabun-og sa nagkadaiyang bahin sa lawas, daling gidala sa mga nakasaksi sa Dr. Ildefonso Alcantara Municipal Hospital.

Samtang ang driver sa dumptruck daling nitahan sa kapulisan sa Alcoy.

Ang ikaduhang aksidente nahitabo pasado alas 10:00 sa gabii niadtong Biyernes, sa may dan Aguinaldo, corner Magsaysay St. barangay Southern Poblacion, lungsod sa Tudela.

Usa ka Nissan Urvan nga kolor blue (plate no. GMY-896) gipanag-iya ni Mayor Rogelio Baquerfo Sr. sa lungsod sa Tudela ug gimaneho ni Cesarito Garelano, minyo, regular nga kawani sa munisipyo nakaligis.

Atol sa hitabo sakay si Baquerfo kinsa paingon na mopauli sa ilang balay.

Si Leonardo Esguera, 23, ulitawo, taga sityo Matin-aw barangay Libertad, lungsod sa Poro, kalit lang nilabang nga wa magtan-aw sa sakyanan nga nagpaingon kaniya tungod busy nga nagsigeg text.

Hinungdan nga naligsan gyud ang tuong tiil ni Esguera, kinsa daling gidala sa Ricardo Maningo District Hospital, apan gibalhin lang usab dayon sa tambalanan diri sa dakbayan sa Sugbo.

Samtang ang driver nitahan sa kapulisan ug lakip sa anaa karon sa police station mao ang sakyanan sa mayor.

Una niini nigawas ang report nga si Baquerfo maoy nakaligis apan gitataw sa mayor nga tinuod sakay siya apan ang iyang driver maoy nagmaneho.

Apan labawng gihimakak sa mayor nga ilang gibiyaan ang biktima.

Iyang gipasabot nga nagpahatod lang una siya sa ilang balay samtang nibilin siyag P10,000 ngadto sa biktima aron una kining maatiman sa tambalanan.

Ang ikatulong insidente nahitabo sa brgy. Ibo, siyudad sa Toledo, pasado alas 9:00 sa gabii.

Usa ka motorsiklo ang gimaneho ni Eleazar Abellana, 25, taga barangay Ilihan, samtang angkas niya ang usa ka Joel Abellana, 26, iyang silingan.