LALAWIGAN sa Sugbo moapod-apod og school supplies alang sa tanang mga tinun-an sa pampublikong mga tunghaan.
Lakip sa magahinan niini ang mga magtutudlo.
Sa tibuok probinsya, ang siyudad sa Sugbo ug ang siyudad sa Lapu-lapu maoy di makapahimulos sa libring school supplies nga gilangkuban sa mga bag, notebook, lapis ug uban pa.
Si Capitol consultant Rory Jon Sepulveda niingon nga ang lalawigan sa Sugbo migahin og P32 milyones alang sa pagpalit og school supplies nga ihatag sa tanang tinun-an sa pre-school, elementary ug high school.
Gihuwat na lang sa Kapitolyo ang report gikan sa Department of Education (DepEd) kon pilay gidaghanon sa mga tinun-an nga nakapa-enroll karong tuiga.
Samtang gipaabot pa usab ang pag-abot ni Gobernador Gwen Garcia aron kaaprobahan ang design sa cover sa matag notebook nga ipanghatag sa Probinsya.
Ang gobernador atua pa karon sa San Francisco, California alang sa opisyal nga kalihukan.
Ilakip sa pag-apod-apod sa lalawigan mao ang karaan nga mga notebook nga napalit sa miaging tuig nga may hulagway ni Garcia ug Bise Gobernador Greg Sanchez.
Si Sanchez, sa sayo pa, nanawagan nga iapod-apod na unta sa Kapitolyo ang maong mga notebook nga anaa gipundo sulod sa usa ka lawak sa Cebu International Convention Center (CICC)0.
Niingon si Sanchez nga ang mga notebook gitaguan sa gobernador ug wa idayon sa pag-apod-apod kay anaa ang iyang hitsura.Niadtong higayona nagsugod na ang bangi nila sa gobernador, matod ni Sanchez.
Apan si Sepulveda sa iyang bahin niingon nga wa tagoi ang mga notebook nga adunay hitsura ni Garcia ug Sanchez. (JFT)