PANGULOHAN ni Senador Pia Cayetano ang 20,000 ka runners nga nagpalistang mosalmot sa 33rd National MILO Marathon-Cebu Leg nga ipahigayon karong buntag ug manukad sa Osmeña Blvd. atubangan sa Cebu Normal University (CNU).

Si Cayetano moapil sa 21-K category diin mas hugot ang kompetisyon tungod anhi kuhaon ang mga maka-qualify alang sa National Finals nga ipahigayon karong Oktubre 11 sa kaulohan.

For updates from around the country, follow Sun.Star on Twitter

Ang tanang runners nga makalusot sa qualifying time nga 1:15 minutos sa men’s division ug 1:35 minutos sa women’s mao ang makaabante sa National finals, nga usa ka 42K full marathon.

Matod ni Milo sports executive Pat Goc-ong nga nagbutang gyud sila og qualifying time aron ang mga madala sa National finals di na kaayo maglisod sa full marathon.

Sa laing bahin, gipasabot ni organizer Ricky Ballesteros nga mas daghan pa gyud unta ang mangapil apan ilaha lang kining gilimit sa 20,000 aron di maghuot sa starting line.

Si Madelyn Carter nga lumad taga Pilar, Siargao Island, Surigao Del Norte, ang modepensa sa women’s title sa 21K. Aduna siya’y oras nga 1:37:02 sa miaging tuig.

Ang gitawag og Cebu Queen of Marathon nga si Liezle Lumindas-Getaruelas di makasalmot sanglit tua man kini sa Cagayan de Oro City sa kasamtangan.

Si Rogelio Reli, sakop sa Phil. Army, di makadepensa sa men’s division kay naa man kini kaulohan.

Tungod niini, abli kaayo ang pultahan sa korona sa men’s division ug lakip sa mga sayong inilog mao sila si Mendel Lopez ug ang magsuong sila si Eugene ug Joel Delposo.

Mokawat og atensyon ang pagsalmot sa artistang si Donna Cruz-Larrazabal sa 10K division.

Ang ubang mga kategoriya nga kombatihan sa lumba mao ang 5K ug 3K.

Si DepEd 7 Consultant Joy Augustos Young mao ang mokablit sa starting gun sa alas 5:30 sa kaadlawon. (Daniel Quindao Guden)