INIHAP nalang ang adlaw sa mga badlungong sidewalk vendors sa siyudad sa Sugbo kay gibahad ni Mayor-elect Michael Rama nga limpyohan ang kadalanan gikan sa mga nagpasad nga street traders sa iyang paglingkod karong Hulyo 1.
Giangkon ni Maria Pino-Buanghog, presidente sa Cebu City United Vendors Association (CCUVA) nga nahadlok ug nabalaka siya sa maong bahad apan nipatigbabaw ang iyang pagsalig sa gisaad ni Rama ngadto kaniya dihang nagka-estorya sila usa ka semana human sa eleksyon.
Matod ni Buanghog nga ang giluwatang bahad ni Rama batok lang niadtong mga di disiplinadong street traders.
Si Rama sa iya unyang pag-asumir sa katungdanan nisaad nga istriktong ipatuman ang one-side vending sa mga sidewalk ug pagdili na sa mga karamota sa kadalanan kay kini maoy usa sa mga hinungdan sa paghuot sa trapiko.
Matod ni Buanghog nga iya nang gipasidan-an ang iyang mga sakop nga hugot gyud nga motuman sa mga palisiya ilabina na ang gidak-on sa ilang mga pwesto aron di maapil sa himuon unyang demolisyon.
Mahitungod niadtong dunay mga karamota, matod ni Buanghog, nga iya nang gipasidan-an ang uban nga mobalik nalang sa ilang mga puwesto sanglit ang uban kanila duna naman gyuy pwesto sa sidewalk ug naghimo lang gihapon og karamota aron madoble ang ilang kita.
Apan niadtong wa gyuy mga pwesto, matod ni Buanghog nga wan a gyud silay mahimo sanglit di man sad gyud tanang vendors ang mahimong ipa-occupy nalang sa tanang sidewalk kay duna may balaod ang siyudad.
"Mangandam nalang ta daan ug mag-iyahay nalang tag pasaylo ilabina niadtong mga undisciplined street traders kay ipatuman na gyud ang balaod. Nahadlok ug nakulbaan ko pero nagpatigbabaw ang akong pagsalig sa gisaad ni Mayor-elect Rama nga kadto rang mga badlungon ang limpyohan," nagkanayon si Buanghog.
Si Rama nipasabot nga di niya tumong nga kulban og kaldero ang mga vendors apan buot niyang ipatuman kon unsa ang angay aron usab di masakripisyo ang ubang katawhan ilabina na ang moagi sa mga sidewalk ug mapakgang ang paghuot sa dagan sa trapiko.