Soc naangol dihang iyang sakyanan naigo

Monday, March 22, 2010

NAGUBA ang hitsura sa drayber sa motorsiklo nga nibangga sa gimanehong sakyanan ni Mayor Socrates Fernandez alas 12:15 sa Cebu South Coastal Road (CSCR) sa eskina San Isidro, dakbayan sa Talisay.

Naangol sab si Mayor Fernandez kay napaso ang iyang tuong kamot kay iyang nagunitan ang tambutso sa motorsiklo nga gimaneho ni Colin Labrado,36, ulitawo nga kasamtangang nagpuyo sa Rufina Arcade, Natalio Bacalso Avenue,Cebu City apan lumad sa Rizal, Pinamungajan, Cebu.

Have something to report? Tell us in text, photos or videos.

Apan imbes isakay sa service vehicle (SFR-451) ni Mayor Fernandez aron dad-on sa tambalanan ang nadisgrasya nga drayber, trisikad na ang naghatod niini sa Talisay District Hospital (TDH).

Click here for Election 2010 updates

Nagsunod sab sa sakyanan ni Mayor Fernandez ang sinagop niyang anak nga si Joavan nga nagmaneho sa iyang green nga Pajero.

Mga nakasaksi nahibulong nganong wa gyud ikarga sa mga sakyanan sa Fernandez ang biktima.

Ang security guard sa TDH nga si Felicisimo Tibay niingon nga unang niabot sa tambalanan si Joavan ug gipaabot si Labrado nga gihatod sa trisikad.

May gikalalis si Joavan nga babaye sa tambalanan apan dihang gisuklan kini nikalit lang og kawagtang.

Taodtaod niabot si Mayor Fernandez ug gisultian sa doctor nga magpa injection og anti-tetanus tungod sa naghubag niyang tuong kamot.

Ang driver sa trisikad nga si Albert Cantila,23,ulitawo nga taga Isla Verde, San Isidro nitug-an sa Sun.Star Superbalita nga wa siya masayod kinsa gyud nila ni Mayor Fernandez ug Joavan ang nakadisgrasya.

“Wa man ko diha sa hitabo gud. Niagi lang ko unya gitawag ko aron pasakyon tong nagkadugo mao ako lang sab gihatod sa ospital,”matod ni Cantila.

Laing trisikad driver nga si Belario Lobiano, 59, nitug-an nga ilang nadungog ang kusog nga panagbangga ug nakit-an sila si Mayor Fernandez ug Joavan nga maoy didto sa lugar.

Gisuwayan sa Sun.Star Superbalita sa pagpakighinabi ang biktima apan nagdumili kini sa pagtubag.

Mismo ang mga nurse nagdumili sa paghatag og impormasyon sa hitabo.

Ang negusyanting si Dory Emit nga naatol nga didto sa tambalanan maoy nakahinabi ni Labrado ug nitug-an nga puti nga sakyanan nga Revo ang iyang nadasmagan.

Si Labrado gikan nga nangaplay og trabaho sa Cebu City ug sa iyang pagpauli agi sa CSCR iyang nadasmagan ang sakyanan sa mayor.

Ang hepe sa traffic division nga si SP04 Henry Obeso nitug-an sa mga tigbalita nga niangkon ang driver sa motorsiklo nga iyang sa.

“Niangkon man to si Labrado nga beating on the red light daw iyang gihimo sa pagtuo nga makaapas pa siya pero disgrasya na hinuon,”matod ni Obeso.

Didto sa dapit nga nahitabuan, usa ka ambulansya nga gisakyan sa mga kawani sa City Hall ang nitunga ug nangita sa motorsiklo ni Labrado nga puwerting gubaa.

Mismo ang kapulisan sa traffic wa masayod kon kinsa ang naghipos sa motorsiklo.