GIHULAGWAY sa kapulisan sa dakbayan sa Sugbo nga malinawon ang gipahigayong transport strike sa mga drayber.

Kini bisan pa sa report nga adunay mga drayber nga nanghasi sa ilang mga kauban nga wa mosalmot sa strike.

Si Cebu City Police Director Senior Supt. Patrocinio Comendador niingon nga sayo kagahapon sa buntag nag-emergency meeting sila sa City Hall.

Usa sa ilang nasabotan mao ang pagpakatap og mga pulis sa kadalanan ilabi na sa mga dapit diin nagtapok ang mga drayber nga nagwelga.

Samtang adunay mga pulis nga ilang gipasakay sa mga Kaoshiong bus ug mga pulis nga gipamutang sa Land Transportation Office (LTO) diin nagtapok ang mga drayber.

Gibutyag ni Comendador nga kagahapon sa buntag dali nilang gipaadto ang mga pulis sa may Bulacao Pardo tungod kay nakadawat silag report nga adunay mga drayber nga gihasi sa mga welgista.

Samtang sa habig sa lalawigan sa Sugbo, si Supt. Erson Digal, deputy provincial director for administration, niingon nga sa ilang habig wa silay nakitang suliran sanglit wa mosalmot ang mga drayber gikan sa mga silingang siyudad ug lungsod nga sakop sa Cebu Provincial Police Office (CPPO). (DRT)