Carmelo D. Lariosa
Panadtaran, San Fernando, Cebu

PAGHILAKAW gyud ni Sam og medyo layulayo gikan sa ilang balay ni Lily, miduol kang Lily ang iyang inahan nga si Nang Sitang. Nagmug-ot ang nawong sa iyang inahan nga morag dunay gikalagutan. Dayon milingkod kini atbang kaniya. Walay lipudlipod nga gikasab-an si Lily.

“Sunod gani, ayaw nag atubanga kadtong lalakiha, ha, Lily!” gahi ang tingog ni Nang Sitang.

For updates from around the country, follow Sun.Star on Twitter

“Ngano man, Nay?” tubag-sukna ni Lily. “Tinarong man ang pagpamisita ni Sam dinhi sa ato…”

“Basin og nalimot ka nga wa mi gusto si tatay nimo Kadoy anang tawhana. Di ba gisultihan ka na man namo nga si Pitoy ang gusto namo nga maoy mahimo nimong bana?” midiyong ang mga mata ni Nang Sitang.

“Pitoy god tawon. Inyo kong ilawog anang tiguwang, Nay?” medyo nakiglalis si Lily. “Wa koy gusto anang tawhana, uy!”

“Wa kay gustong Pitoy kay adto kang Sam kay guwapo. Sus, Lily, gusto tingali ka nga mag-antos kon maminyo ka anang Sam,” nangugat si Nang Sitang.

Unya nabati nila nga may miabli sa pultahan. Si Noy Kadoy diay ang miabot. Nagdala kinig mga ‘groceries’ ug nagkapuliki kay upat man ka dagkong putos ang iyang karga.

Mitan-aw si Nang Sitang kang Noy Kadoy. “Nia ka na diay, Kadoy? Mayo kay misayo kag pauli aron imong segundahan og maymay king imong supakirang anak!”

“Kay ngano man god, Sitang?” Gipahimutang ni Noy Kadoy ang iyang dala ibabaw sa lamesa.

“Dinhi na sad si Sam, namisitang Lily,” ni Nang Sitang.

“Uy, morag di na ni maayo da. Lily, anak, gusto namo nga si Pitoy ang imong mabana. Buotan si Pitoy ug kuwartahan pa. Kini ganing groceries nga akong dala si Pitoy ang nagpalit nini. Unya, anha ka anang Sam nga bugoy ug naa lang pirmi sa tindahan nilang Estong-Kayang mag-estambay kuyog sa mga barkada. Way nahimo kay sige lang og kaskas anang iyang gitara,” mug-ot pod kaayo ang nawong ni Noy Kadoy nga mibiya ug mipaingon sa kusina.

Kahilakon si Lily nga naghunahuna nga ang iyang mga ginikanan gusto gyud kang Pitoy. Mitulo gyud ang iyang mga luha.

NIANANG pagkagabii namisita si Pitoy kang Lily. Diha niya iparking ang iyang kotse ilawom sa kalatsutsi duol sa balay nilang Lily.

Gipugos gyud si Lily sa iyang amahan ug inahan sa pag-atubang kang Pitoy; maong miabi-abi na lang siya sa ulitawong guwang. Kontra-gusto ang linihukan sa dalaga ug misamot pagbukal ang iyang dugo dihang may gisulti si Pitoy nga wa niya maklaro.

“Unsa toy imong gisulti, Pitoy?” ni Lily nga wala kaayo makadungog kay gihinay man Pitoy paglitok.

“Pahagka ko bisag kausa lang, kay kutob na lang karong gabhiona ang akong pagpamisita nimo, Lily,” matod ni Pitoy nga mitutok sa dalaga. Gikab-ot ni Pitoy ang kamot sa dalaga.

“Bastos!” mitaas ang tingog ni Lily dungan ang pagtamparos sa nawong ni Pitoy.

Nawingig si Pitoy ug wala makatingog. Mitindog kini ug dayon milakaw nga way pupananghid.

Nasuko sila si Noy Kadoy ug Nang Sitang sa gibuhat ni Lily ug hapit usab nila kini hitamparosi. Nauwaw sila kay dako ra ba silag utang kang Pitoy.

Pagkasunod adlaw mikaylap ang balita nga si Sam gipangita sa mga igsuon ni Sally, kay nagtaban ang duroha. Si Sally anak nga dalaga ni Estong-Kayang nga hilom nga naibog kang Sam. Kay nakagusto man si Sally kang Sam, iya kining gisugot ug sige na kinig hawok-hawok ug gakos-gakos sa bigot niyang lawas.

Bakakon nga lalake! Misinta ang kahiladman ni Lily sa kasilag ngadtong Sam. Karon nakahukom siya nga iya na lang sugton si Pitoy. Maaypa si Pitoy, kay gawas nga panggaon unya siya niini kon magluon sa sila sa salag sa kaminyuon, dili siya magkalisudlisod sa kinabuhi kay dato man kini.

Usa ka buntag gisultihan ni Lily ang iyang ginikanan sa iyang hukom nga mosugot na siya nga makigminyo kang Pitoy. Nalipay sila si Nang Sitang ug Noy Kadoy sa gipahayag ni Lily.

Nianang gabhiona nagpaabot si Lily kang Pitoy, apan wala kini mopatim-aw. Unya si Andoy, silingan nilang Lily, mitaho nga may nahitabo kang Pitoy.

“Naunsa diay si Pitoy, Andoy?” nagpakisayod si Lily.

“Lily, si Pitoy naghikog! Patay na siya. Malathaion ang iyang giinom ug wala na maluwas sa doctor,” ni Andoy.

Sa nabati ni Lily, miluom siya paghilak. Nakonsensiya siya kay basin og ang pagtamparos niya kang Pitoy maoy hinungdan sa paghikog niini, o di ba, kay wala kini niya tugti sa paghawok kaniya bisag kausa lang. (KATAPUSAN)