Sugilanon: Ang duwaan sa engkanto

Tuesday, August 31, 2010

Rodel C. Nuñeza
Maslog, Tabogon, Cebu

IGO gayud nga mitaob ang dagat dihang nahiabot ang grupo nila ni Mameng sa baybayon sa Tagasa, usa ka dapit nga nahimutang haduol sa simbahang Katoliko sa Tabogon.

Have something to report? Tell us in text, photos or videos.

Naglumbaanay dayon sa pagpanagan ang mga kauban ni Mameng paingon sa dagat aron mangaligo. Siya nangita og kapasilungan kay di man siya gustong maligo.

Updates on President Benigno Aquino III's presidency

Nahiabot siya sa usa ka dapit diin may usa ka dakong kahoy nga daghan kaayog mga sanga nga nakahatag og landong sa maong dapit. Anhi lang siya magpaabot sa iyang kaubanan.

Gisuhid niya ang palibot. May nasigpatan siyang usa ka gamayng langob diha ra duol sa kahoy. Nasalipdan kinig diyutay sa daghang mga ihalas nga tanom.

Miduol si Mameng sa baba sa langob. Gamay ra ang baba, apan igo gayud siyang maarang kay gamay man siyang pagkabata. Dili unta siya mosulod apan may usa ka butang nga nakadapit sa iyang pagtagad. Napugos siya pagsulod.

Sinaw kaayo ang butang. Human mapunit ni Mameng ang butang iya kining gihiling-hiling. Usa diay ka matang sa dakong sigay nga gitawag og ‘buwaw.’

Paghiuli ni Mameng sa ilang balay gikan sa Tagasa, iyang gisulod ang butang sa hunos sa ilang aparador nga gibutangan sa uban niyang mga gamit.

Nianang pagkaugma samtang nag-inusara lang si Mameng sa ilang balay may miabot nga usa ka batang babaye nga puti kaayog pamanit. Nagsakay kinig kabayong itom.

Kay mahigalaon man kaayo ang batang bisita, gitagad kini ni Mameng. Gipasaka kini niya sa itaas sa ilang balay, ug dinhi sila mag-estoryahay.

Nahibaw-an ni Mameng nga Ada ang pangalan sa bata.

“Hain ka man diay magpuyo, Ada?” sukot ni Mameng.

“Tua sa Tagasa,” tubag ni Ada.

Nahibulong si Mameng kay wala man siyay nakita nga balay sa maong dapit, bisan payag na lang. mga kakahoyan ra man ang iyang nakita didtong dapita. Ug kadtong gamayng langob nga iya ganing nasudlan sa pagkuha niya sa buwaw.

“Nakakita ka sa akong duwaan, Meng?” ni Ada. “Kita man ko nimo nga misulod sa among pinuy-anan.”

Naglibog si Mameng. Kusganon siyang milimod kay wala siyay nakita nga duwaan didto sa Tagasa. Wala man sab maghisgot si Ada sa buwaw.

“Wa man ko kitag duwaan didto, Ada,” ni Mameng.

Mibiya si Ada sa panimalay nilang Mameng. Misaad nga mobalik.

Nianang pagka gabii kalit lang nga gitakbuyan og taas kaayong hilanat si Mameng.

Napugos siya paghigda kanunay sulod sa daghang mga adlaw. Sa paghiling sa meriko nahibaw-an nga ang hinungdan sa sakit ni Mameng mao ang pagtinil ni Mameng sa usa ka butang nga gipanag-iya sa mga dili ingon nato kun engkanto. Mitambag siya nga kon duna man gani gihuptan si Mameng butang nga dili iya, kinahanglan iuli kini didto diin niya kuhaa.

Usa ka adlaw niana miduaw si Ada kang Mameng, sakay sa iyang kabayo. Apan pagkakita niya sa meriko wala siya modayon pagsaka sa balay ug mobiya na unta. Apan nakit-an siya ni Mameng.

“Ada, dayon una!” ni Mameng.

Misaka sa itaas si Ada. Nakita niya ang buwaw nga gikuptan ni Mameng. “Ang akong duwaan kana,” matod ni Ada.

Human ikauli ni Mameng ang buwaw ngadtong Ada kalit lang nga gihuwasan siya sa iyang hilanat. Ug mibalik ang kapiskay sa iyang lawas.(KATAPUSAN)