Kevin A. Lagunda
Pagsabungan, Mandaue City

SA WA pa makit-i pagkaugma sa sayong kabuntagon si Noy Tinoy nga nagkub sa dan ubos sa skywalk sa Basak, dakbayan sa Mandaue, nakit-an na siya usa ka gabii niana sa Hermag nga hubog, nagsusapinday, nagsigeg singgit sa ngan sa iyang asawa.

Pagkataudtaod, nakit-an nga niyaka si Noy Tinoy sa yuta ug kusog nga ningaab.

Sun.Star accepts donations for victims of Typhoon Ondoy

“Nabuang na gyud nang tiguwanga. Nabuang na gyud! Kuan man god, kanang gibiyaan man god siya sa iyang asawa, ni Petring,” hunghong sa usa ka babaye nga nakakita kang Tinoy ngadto sa silingan nga iyang kumare.

Nibarog na sab si Noy Tinoy. Nagsusapinday. Ang iyang mga tiil wa mopadung sa ilang balay. ‘Unsa pa may ulion nako? Ang balay dili balay kon naay kuwang. Ang balay way kinabuhi kon di kompleto ang nagpuyo!’ ni Noy Tinoy sa iyang hunahuna.

Dayon nadunggan si Noy Tinoy nga nagpanawag sa iyang asawa. “H-Hain k-ka n-na man, Petriiinggg? U-uli na tawon!”

“Di man na palahubog si Noy Tinoy sa una. Nagsugod lang ang iyang pagkapalainom dihang nataktak siya sa iyang trabaho,” saysay sa usa ka lalake ngadto sa iyang ka-boardmate nga lalake sab.

“Mao ba, Choy?” gikan sa boardmate.

Miyango ang nagsaysay.

Kon unsa ang trabaho ni Noy Tinoy ug diin siya nagtrabaho ug unsay hinungdan sa iyang pagkataktak, wa na lang mangutana ang lalaking ka-boardmate. Ingon ana lang ang bation sa tawo.

Magwala sa kaugalingon kon mawad-ag trabaho. Ma-desperado. Kay kinabuhi ang trabaho.

Nagpadayon ang estoryahay sa lalake ug sa iyang boardmate.

“Tungod sa iyang pagkawala nay trabaho gilayasan na nuon siya sa iyang asawa,” padayon nga misaysay ang lalake ngadto sa iyang boardmate.

“Uy, si Noy Tinoy! Ha? Naunsa man si Noy Tinoy?! Si Tinoy?!” dihay mga tawong naninggit.

Daw naalimungawan ang lalake nga nagsaysay sa kinabuhi ni Noy Tinoy. Mikalit og kasaba ang boarding house.

“Naunsa diay si Noy Tinoy?” may laing boardmate nga nangutana.

Mibangon ang lalake. Miduol siya sa iyang boardmate nga babaye.

“Naunsa si Noy Tinoy?”

“Naghikog!”

“Ha?! Naghikog?! Kanus-a?”

“Kagabii.”

“Diin man?”

“Didto sa skywalk sa Basak, duol sa eskuylahan.”

“Tawon sad…”

Kagabii kadtong pagbarog ni Noy Tinoy, pagkahuman niyag ngaab nga nagpanawag kang Petring. Nagsusapinday siyang nilakaw hangtod nahiabot siya sa skywalk sa Basak.

Nisaka siya sa skywalk. Nikatkat sa railing. Ug nilayat nga morag didto siya sa dagat ni-dive. Ang iyang nawong ug dughan ang nag-unag panugpa sa sementadong dan.

Nilagubo ang iyang dughan. Nituasik ang iyang dugo. Gilabay ni Noy Tinoy ang iyang kaugalingong ginhawa. Ug dayon nitaliwan ang iyang kinabuhi. (KATAPUSAN)