Mar Mañus, Jr.
Basak-Iba, Lapu-Lapu City

SAMTANG namahaw kami si Pina nabati namo nga nagatagawtaw si Iya Tasya. Duna gyuy gikalagutan pag-ayo.

Si Pina nga akong asawa wala motiwas og kaon ug migula aron pagsuta kon unsay nasuk-an sa tigulang kansang balay anaa mahimutang sa luyo sa among kusina. Nakahunahuna kong mosunod apan giganahan man kaayo kong miukit sa buwad nga tabagak nga sinugba nga akong gistuslob sa suka nga akong gipus-an og daghan kaayong siling kulikot.

Gipasagdan ko lang si Pina. Mitiwas kog kaon, ilabi na nga dugay na kaayo kong wala na makakaon og binuyok nga bugas mais.

Sun.Star accepts donations for victims of Typhoon Ondoy

Nanabisay ang mga singot sa akong agtang tungod sa kahalang sa suka nga akong gitusloban sa tabagak. Hapit nako mahurot ang usa ka bandehadong binuyok.

Pagkahuman miinom kog tubig ug unya nanug-ab kog kusog.

Nadungog nako nga wala pa gyud mohilom si Iya Tasya ug ning higayuna mihangos na. Wa na ko makapugong. Migawas na lang ko ug gibiyaan ang among kinan-an nga wa pa mahipos.

Maoy akong naabtan si Pina nga nagsige og hapuhap sa buko-buko ni Iya Tasya.

“Iya Tasya, unsa ning hitaboa?” sukot ko sa dihang dinha na ko sa ilang atubangan.

“Hus!” nangusmo si Iya Tasya nga misamot paghangos. “Gitibak ning babayeng mabdos nga nag-abang sa pikas kong kuwarto!

Nagbutang-butang og bagakay kay panguntra kuno sa ungo. Pesteng dako! Unsa man iyang pagtuo nako, ungo ko? Wa uroy maikog nga pila na ka buwan nga wa kaabang! Salbahisssss!”

“A, aylag lainag sabot, Iya,” miam-am si Pina. “Di ikaw ang gitagan-an anang bagakay, uy.”

“Wa gyuy lain! Nagtuo gyud nang kanahan nga ungo kooooo!” Hapit na lang mokulisiw si Iya Tasya.

“Bitaw, Ya,” missal-ot ko. “Dili ikaw ang giandaman anang bagakay. Kay kami lang si Pina, kanang lawom na ang gabii magsige pa mig panghiwa sa mga dahon sa saging para sa igbabaligya namong puto, makadungog baya mig kikik nga magsabay-sabay. Kon wa pa lang nako am-ami’s Pina, hagbaya ra kahang miundang og pamuto.”

“Hmp!” katapusang pulong ni Iya Tasya dayon sulod sa iyang kuwarto biniyaan kami si Pina.

Pagkagabii igo pa lang gani ming nahuman si Pina og hawob sa mga dahon sa saging, diha na say kikik nga nagisgeg sabay-sabay tungod gyud sa kuwarto nga giabangan sa babayeng mabdos. Niadtong higayuna bag-uhay pa nga nahiabot ang iyang bana gikan nga nag-obertayim sa trabaho.

“Kikik! Kikikkk… kikkkiiikkk!” misabay-sabay na pod ang kikik.

Nagtinutokay mi si Pina samtang nanghiwa sa mga dahon sa saging. Unya akong giwiwi ang kurtina sa bentana sa kusina ug nanil-ip kami sa gawas. Among nakita ang bana sa babayeng mabdos nga migawas binitbit ang bagakay nga tinalinsan ang tumoy. Misaka kini sa atop agi sa sanga sa punoan sa dakong mangga nga nag-umbaw sa atop sa ilang giabangan kuwarto.

Mikamang kini sa atop nga sin ug pagbalik sa kikik, kalit siyang mitindog ug gihapsan sa bagakay ang kikik.

“Ump!” Usa ka kusog kaayon hapos ang giluwatan sa bana sa babayeng mabdos ngadto sa kikik.

“Kik!” Mitig-ik ang kikik. Maayo kining pagkasabak sa gihapos nga bagakay pero nakagahom pa gihapon kini sa paglupad pahilayo.

PAGKAUGMA sa buntag, wa pa gani mi makapamahaw si Pina, among nabati nga isog na sad kaayo ang tingog ni Iya Tasya nga nangasaba sa babayeng mabdos ug sa bana niini. Niadtong mga orasa wa pa makalakaw ang bana paingon sa trabahuan.

“Pamahawa na mo dinhi! Bahala nag di mo makaimpas sa iyang bayranan sa abang. Karon na lang mong adlawa kutob. Mga inahak mong dagkooo!”

Puwerte gyung laguta ni Iya Tasya sa babayeng mabdos ug sa bana niini. Unya mibalik siyag sulod sa iyang kuwarto. Nagtakihod ug naghapyod sa iyang hawak. Nagping-it sa kasakit nga morag nabunalan.

Nagtinutokay mi si Pina. (KATAPUSAN)