NAG-UKON-UKON si Reymon nga misagol sa panon sa mga tawo nga naglinya. Gibati karon niya ang pagduha-duha. Ang bagang duot sa katawhan nga naglinya susama sab sa hataas nga kutay sa mga tawo nga kanunay pilahan sa mga kabos nga kaigsuonan aron makapalit og baratong bugas humay sa NFA nga gituyo sa gobyerno alang sa kabos nga mga pamilya.

Apan alang kang Reymon lahi kining linya nga iyang gipilahan karon. Adunay tagsa-tagsa ka yawe nga ihatag sa upaw ug bigotelyong sikyu nga nagbantay sa pultahan ning dakong bilding nga ilang pagasudlan karon. Daghan ang gibalibaran sa sikyu nga di makasulod. Daghan ang wa makasulod sa pultahan kay wa gayud hatagi og yawe sa sikyu.

For updates from around the country, follow Sun.Star on Twitter

Nakapanglingo si Reymon. Gikulbaan siya nga tingalig di siya makasulod. Gibiyaan gani niya ang iyang pamilya aron mamasin sa pagsulod ning dapit nga gituhoan niya nga anhi makaplagi ang tumang kalipay ug kaharuhay sa kinabuhi. Apan kadaghan ba sa naglinya ang gibalibaran sa pagpasulod sa maong guwardya!

Daghan ang wa hatagi og yawe alang sa tinakpang pultahan.

Bisan pa sa pagpakiluoy sa nanaglinya hugot gyud nga namalibad ang sikyu. Naklaro ni Reymon ang gipamulong niini.

“Pinili lang ang hatagan sa yawe sa kabulahanan! Ug kamong tanan nga naglinya karon, nasayod na mismo sa inyong kaugalingon…!”

Nagbutok-butok ang dughan ni Reymon nga nakig-atubang sa sikyu.

Hugot siyang gitutokan niini. Gitunolan siya og yawe.

Hilabihang lipaya ni Reymon. Apan dihang milakang na siya aron ablihan ang tinakpang pultahan pinaagi sa yawe, gihawiran siya sa sikyu.

“Balik una sa imong pamilya. Di pa diay panahon mo nga mosulod ka ning dapita. Dad-a ug gamita kanang yawe alang sa laing tahas nga isangon kanimo. Daghan ka pag palinyahon nga mga tawo aron makasulod ning dapita. Pauli ug balik sa imong pamilya, Reymon…!” matod sa sikyu nga nagpahiyom.

SUNOD nga nasulod sa pandungog ni Reymon mao ang singgit sa kalipay sa iyang asawang si Rose nga migakos kaniya nga naghilak. Sa iyang kiliran diha usab sila si Ric ug Rhea, ang duha niya ka anak nga ulitawog dalaga. Si Ric ug si Rhea pulos na mga propesyonal nga lisensiyadong enhinyero.

“N-Nabuhi si Reymon! Salamat sa Diyos!” nakasinggit si Rose.

“Praise the Lord, Papa Reymon! Nabuhi si Papa…” tuaw ni Ric ug ni Rhea.

Gikipatkipat ni Reymon ang iyang mga mata. Ania diay siya sulod sa usa ka lawak sa pribadong ospital. Ubos siya sa intensive care unit (ICU). Gitangtangan na siya sa dextrose ug oxygen.

Miabot na man god ang tagal sa iyang kinabuhi. Kanser sa baga ang iyang giantos nga sakit. Apan karon gibati niya ang kaluag ug kahayahay na sa iyang pagginhawa.

“Usa ka oras na nga nabugto ang imong gininhawa, Rey! Bag-o lang nga nanglakaw ang nagmasulub-on natong mga kauban sa Servant Community nga nakasaksi sa pagkabugto sa imong kinabuhi. Karong adlawa man god kutob ang gitagal sa doktor sa imong kinabuhi!” nagpamahid sa iyang mga luha si Rose.

Nakapanglingo sa kahibulong si Reymon. Diha sa iyang kamot ang usa ka kuwentas nga may dakong krus ang ‘pendant’nga larawan sa Ginuong Hesus nga nagbitay sa krus.

Ang ‘yawe’ nga gihatag kaniya sa bigotelyong sikyu dihang nilinya siya aron makasulod sa tinakpang pultahan sa dakong bilding. (KATAPUSAN)