Sugilanon: Bakasyonista

Thursday, April 29, 2010

Oliver P. Flores
Sogod, Cebu

NALINGAW si Elmer nga nagtan-aw sa mga nangaligo sa beach resort nga iyang gidumala. Siya ang caretaker niini. Ordinaryong beach resort lang ang iyang gibantayan. Duna kini mga open cottages, pero way mga kuwarto nga katulganan niadtong gusting mo-estar og pipila ka mga adlaw sa beach.

Have something to report? Tell us in text, photos or videos.

Dunay gitukod nga gamay nga balay ang tag-iya sa beach resort nga tua magpuyo sa siyudad, alang sa pagpuyo ni Elmer. Duna kini usa ka lawak, gamay nga sala, banyo ug kusina. Ulitawo pa si Elmer bisag nagpanuigon na siya og kuwarenta. Maoy gusto niyang pangasaw-on ang matahom, seksi ug batan-ong babaye.

Click here for Election 2010 updates

Samtang nagsuroy-suroy si Elmer sa baybayon, naalinggatan niya ang usa ka babaye nga sa iyang tan-aw nagpanuigon og di molapas sa bayente-dos. Nagdala ang babaye og traveling bag, nagkarsones og maong nga fitting nga maoy nakapahulma sa bigot niyang sampot ug seksi niyang lawas. Nagblusa kini og fitting sab nga nakapaugdo pagsamot sa hustong gidak-on niining mga suso.

Bakasyonista! Mao kini ang diha sa hunahuna ni Elmer. Apan nganong nia man siya sa beach nga way lawak nga gipaabangan? Gisundan niya pagtan-aw ang babaye. Didto kini mopaingon sa mingaw nga dapit sa baybayon. Unya miyaka sa puting balas.

Giduol ni Elmer ang babaye.

“Kining, Miss, maligo ka ba?” Karon nga diha na si Elmer sa duol sa babaye, iyang nasuta nga matahom kini.

“O. Pero gusto una kong mopahuway. Duna bay kuwarto nga kaabangan nako dinhi? Mobakasyon kog pipila ka adlaw dinhi.” Nagpahiyom ang babaye kang Elmer.

Gipahiyuman sab ni Elmer ang babaye. Unya nag-ila-ila sila. Jona ang ngalan sa babaye. Nadani dayon siya sa katahom niini. Misugmat na sab ang kadukirok niya sa babaye. Daghan nang mga babaye ang miagi sa iyang mga kamot apan igo lang niyang gipahilak.

“Kining, Jona, kon gusto ka, sa akong kuwarto ka lang matulog. Sa sala lang ko matulog panahon sa gabii.”

“Sige. Moabang lang ko sa kuwarto.”

Ug nianang pagka gabii human makapanihapon mipahuway na si Jona sa lawak. Ug si Elmer naghigda-higda sab sa sala. Nianang pagkatungang gabii, wa gyud makapugong si Elmer sa iyang kaugalingon. Gisulod niya si Jona sa lawak.

Nalipay siya kay wa mosupak si Jona sa iyang gusto. Migakos kini og hugot kaniya. Nagdali sila paghubo sa ilang gipanul-ob.

“Nakagusto ka sab diay nako, Jon?” naghangos si Elmer.

“Oo, El. Parehas tag gibati. Nasayod ko nga naibog sab ka nako.” Nagpiyong si Jona nga nagpamatyag sa kalalim.

Morag asawa na ni Elmer si Jona human niadto. Magdungan sila pagpangaon. Nag-ipon na silag pangatulog sa lawak. Apan usa ka buntag namat-an ni Elmer nga wa na si Jona uban ang dala niining mga sinina ug traveling bag. Igo na lang nga nakapanglingo si Elmer sa kahinugon.

USA ka buntag mipalit og Superbalita si Elmer aron kalingawan og basa samtang nagbantay sa beach. Naniga ang iyang mga mata pagkakita sa dakong picture ni Jona sa front page. Kalit siyang gikulbaan. Iyang gibasa ang balita bahin sa babaye.

Ug iyang nasayran nga gipangita kini sa mga tinugyanan sa Departamento sa Panglawas kay mananakod ang sakit niini. Dunay HIV virus ug may sakit nga AIDS si Jona.

Gipaningot si Elmer og bugnaw. Morag nanggimok sa kalit ang iyang kaunoran.

“Diyos ko!” nasangpit ni Elmer ang Ginuo nga wa lang niya tuyoa. Unya nanlumoy siya. Nangluspad nga naghunahuna sa iyang kaugalingon. (KATAPUSAN)