Sugilanon: Gabiing way gugma

Tuesday, March 16, 2010

Rodel C. Nuñeza
Maslog, Tabogon, Cebu

UNANG misulod si Dina sa ilang kuwarto kay ang iyang bana nga si Kevin nagtan-aw pa man sa salida sa telebisyon human kini maligo sa banyo. Humana usab ang ilang pagpanihapon.

Have something to report? Tell us in text, photos or videos.

Wala gayud mahimutang si Dina samtang naghigda diha sa kama. Kanunay siyang nag-alindasay ug gigil-asan pag-ayo ilabi na kay gibati usab niya ang kaalimuot sa panahon niadtong tungora, bisan tuod bag-uhay pa lang usab siyang naligo. Nag-una siyag kaligo kay kang Kevin.

Click here for Election 2010 updates

Nabag-uhan si Dina sa iyang kahimtang kay kining gabhiona mao man ang unang gabii nga makahigda siya sa kuwarto ni Kevin nga nahimo niyang bana. Bag-o lang silang nakasal. Kaganiha pa lang sa buntag sila nakasal nga gitambungan sa ilang mga ginikanan, kaparyentihan ug kahigalaan.

Apan lahi kaysa ubang bag-ong kinasal wala gayud magmalipayon si Dina sa adlaw sa iyang kasal. Gani kanunay lang siyang nagsubo sukad pa sa bisperas sa ilang kasal. Hapit nagbuntag nga nagsige siyag hunahuna sa nahimo niyang kapalaran.

Kinsa ba tuod ang malipay kon ipakasal ka sa usa ka lalake nga wala gayud nimo higugmaa? Wala gani nimo mahimong trato? Ug wala gani nimo gayud ikasuod kay talagsa ra man kini nimo makita?

Pinugos ang pagpakasal ni Dina kang Kevin kay wala man gyud siyay gusto niini. Ang iya ra mang mga ginikanan ni Dina ang may gusto kang Kevin nga mahimo niyang bana. Suod man god nga managhigala ang mga ginikanan ni Dina ug ang mga ginikanan ni Kevin. Magkasusyo sila sa negusyo kay pulos negusyante.

Gawas pa may trato na si Dina sa wala pa siya itupo sa iyang mga ginikanan ngadto kang Kevin. Milungtad nag mga tulo ka tuig ang ilang relasyon. Gihigugma niya ang iyang trato nga nahigugma usab kaniya. Nagkasabot na gani sila nga magminyo inigkatapos ni Dina sa iyang pagtuon sa pagka magtutudlo.

Ang kahasol wala mobiya kang Dina samtang naghigda sa kama ni Kevin. Nahisama siya sa usa ka patyunon nga nagpaabot na lang sa mapintas nga silot nga ipahamtang kaniya.

Wala madugay misulod sa kuwarto si Kevin. Nagtapis pa gihapon kini og tualya. Nagsul-ob og T-shirt nga walay manggas. Gipawong ni Kevin ang suga sa kuwarto ug midulog dayon kang Dina. Unya mitanday dungan ang pagpatong sa usa ka bukton niini diha sa dughan ni Dina.

Bisan nakamatngon si Dina nagpatulog-tulog siya. Gipasagdan lang niya ang usa ka paa ni Kevin nga mitanday sa iya usab nga paa. Nagpahagok-hagok siya. Ug gipasagdan lang gayud niya ang mga kamot ni Kevin nga nagsigig panghiram sa iyang lawas. Dihay higayon nga nakautong si Dina kay gigigkan kaayo siya sa pagpunay og hinol ni Kevin sa labing mahinungdanong bahin sa iyang lawas. Gisigihan man god ni Kevin pagduwa sa iyang mga tudlo ang tinipigan niyang bulak.

Samtang nagpadayon si Kevin sa iyang gibuhat nagpatara lang si Dina. Kanunay gayud siya nga nagpugong, nga dili siya dag-on sa iyang tawhanong kahuyang. Hangtod nakutlo gyud ni Kevin ang kaputli sa iyang pagkabulak. Apan alang kang Dina mahimong angkunon ni Kevin ang tibuok niyang lawas, apan dili gayud mahitabo nga iapil niya pagtugyan ngadto niini ang iyang kasingkasing ug kalag. (KATAPUSAN)