Sugilanon: Ganti sa kabuotan

Thursday, March 18, 2010

Ruby L. Pescante
Bogo City, Cebu

NING sayong kabuntagon bisan naglugitom pang langit, nagbiyahe na si Isok sa dyip nga Ford Fiera. Mingaw pang Colon. Ug tulo ray iyang pasahero para Piyer 3.

Have something to report? Tell us in text, photos or videos.

Naguol siya ron kay gibaharan na siya sa iyang amo nga kon di siya gihapon makaabang sa husto nga tag P300 ang adlaw, mapugos kinig taktak niya. Usa na man god ka semana nga kulang ang iyang abang. Saon nga sukton man siya matag adlaw sa bayranang tag P200 ang adlaw dalang tanto nga diyes porsiyento balig duha ka semana. Nakautang siyag dako kay na-ospital ang iyang masusong anak tungod sa dengue.

Click here for Election 2010 updates

Kagahapon unta to, dihay bag nga nahabilin sa sakyanan nga puno sa binantal nga tag libuhong mga papel de banko. Apan gidali niyag hatod sa estasyon sa kapulisan didto sa Piyer 3.

Ug karon nagabii na lang wa na gyud siya makatigom og igo-igong kuwarta. Kuhaan sa P200 ug sa gasoline, ang nahabilin dako gihapog kulang sa abangan. Katulo ra man god siya makatuyok, ug bisan puno gikan sa piyer, inigabalik di na gani makadala bisag tulo ka buok pasahero.

Sa iyang hunahuna kon ugmang adlawa tinud-on gyud sa tag-iya dakong problema ang pagbayad sa iyang tinantohan. Lisod sab pagpangitag laing kadrayban dayon kay daghan ang bakanteng drayber.

Naguol gyud si Isok. Inigka-Sabado ra ba ang iyang asawa motugbong sa siyudad aron pagpangayo sa ilang alawans sulod sa usa ka semana.

Tulo ilang anak. Ang duha nangiskuwela na sa Hagnaya Elementary School didto sa San Remigio. Mogradwar sa siksto grado ang kamaguwangan.

Nakapanglingo siya samtang nagdagan subay sa Colon kay mopauli na sa Labangon diin magpuyo ang iyang amo. Ang kaganinang tutaligsik lang, karon mibunok nag kusog ang uwan.

Sa paggrahe niya sa nataran mao say pagtuang sa uwan. Apan sa iyang pagyanghag sa itaas sa balay may mga bisita ang iyang amo.

Ang usa pulis. Kinsa kahay dakpon niini?

Gisugat siya ni Noy Noli, iyang amo, sa may hagdanan ug ingog may kalibog sa iyang dagway.

“Niay pulis nga nangita nimo. Say sala nimo didto sa piyer?”

Misamot kalamugdong ang daang subong panagway ni Isok.

Nagpaabot na sab siya sa sunod niining isulti human ikahatag niya ang abangan. Seguro nang wa na siyay trabaho sunod adlaw. Ug bahin sa pulis, wa siyay nahinumdomang kalapasan niya.

Nanaka sila si Noy Noli ug Isok sa itaas. Mitindog dayon ang pulis ug ang tambukong babaye. Miduol sila kang Isok.

“Salamat kaayo, Dong! Salamat kaayo nimo…” matod sa babaye nga mitunol kang Isok og tulo ka tag-libohong papel de banko.

Wa siya makasabot sa iyang gibati. Nagpanagana siyag dawat sa kuwarta. Naglibog siya nganong gihatagan siyag kuwarta sa babaye. Apan gisulod gyud sa babaye sa bulsa sa sinina ni Isok ang kuwarta. Ang babaye ug ang pulis milamano dayon kaniya.

Gilamano sab si Isok sa iyang mga amo, ang bana ug asawa, nga sayag kaayog mga panagway.

“Kalimti ang akong gisulti kagahapon nimo, Sok. Siyay tag-iya sa bag nga imong giintrigar sa kapulisan. Kasaligan gyud ka.

Buotan. Mao nay gipangita kos drayber,” matod ni Noy Noli.

Wa hisabti ni Isok ang iyang gibati niadtong higayuna. Paglantaw niya sa gawas lusot sa pultahan gikan sa iyang gitindogan, misigyab na ang kabituonan kay wa nay nakasalipod nga dag-om.

Midan-ag ang langit. Ug sa iyang hunahuna nagpasalamat si Isok sa Ginuo. (KATAPUSAN)