Sugilanon: Karong adlawa na lang kutob ang paghandom

Monday, July 26, 2010

GIHIPOS niya ang nagkatag nga mga sulat ni Estrella sa iyang drawer. Nadani sa bulok sa sobre nga pink, iyang gikuha ug gibasa. Miagahad siya. Gitutokan ang ikatulo nga parapo.

“Di masukod ang gidak-on sa akong gugma kanimo, Epifanio. Kon motalikod ka sa atong gipanumpaan, maghikog gyud ko.” Ang suwat pinetsahag Hunyo 4, 1990, New York.

Have something to report? Tell us in text, photos or videos.

Updates on President Benigno Aquino III's presidency

Mibalik kaniya ang talan-awon sa NAIA airport. Naghilak si Estrella. Nagpaabot siya niadto sa Flight No. 2348 sa Philippine Airlines nga maoy iyang sakyan padulong sa New York.

“Tingalig malimot ka na nako, Epe, kon tua na ko sa States.”

“Di na mahitabo, Ester, kay way lain kong gihigugma ikaw ra gyud.”

Usa ka nars si Estrella nga nagtrabaho sa usa ka pribadong ospital dinhi sa Sugbo.

Samtang siya usa ka accounting clerk sa maong ospital nga nagpadayon pagtungha sa kursong abogasiya. Nagkailhanay sila sa canteen sa ospital. Nagkasuod hangtod nagkahinigugmaay. Unya, nadawat siya nga nars sa usa sa mga dagkong ospital sa New York.

Di maihap ang mga suwat ni Estrella. Hilig siya sa mga suwat.

Bisan magtawganay sila sa cellphone, kanunay kining mosuwat kaniya. Sama ning suwat kolor green ang sobre pinetsahag Mayo 7, 1992, New York.

“Nasuroy na nako ang tibuok New York, maayo untag nia ka uban kanako kita magkuyog.

Hinuon, makalingaw sad si Stewart, ang bag-o nakong kaubang nars nga merkano sa among ospital.”

Sa laing suwat kolor kape ang sobre miungot ang iyang panan-aw.

Iyang giukab. Ang petsa Enero 5, 1994, New York. Upat na ka mga tuig sukad migikan si Estrella.

“Karon ra ni nako ibutyag ang tanan. Dugay na ming live-in ni Stewart. Unsaon man, Epe, natental gyud ko. Sunod semana kaslon na mi. pasayloa gyud tawon ko!”

Mora siyag nabuang. Naglatagaw matag gabii. Kanunayng hubog.

Daw di siya makatuo nga buhatan sa ingon sa babayeng iyang gihigugma. Maluibon siya. Babayeng haguka ang baruganan. Nagkadaiya lang ang iyang panghimaraot kang Estrella.

Milabay ang katuigan, wa pa gihapon siya makalimot kang Estrella. Kanunayng nagpasulabi sa iyang kaisipan ang mga handumanan nilang duha. Labi pa, niadtong higayon nga gitugyan kaniya ni Estrella ang iyang pagka birhen sa usa ka hotel.

“Ikaw ang nakabuak sa akong mansanas, Epe, please don’t leave me! Patyon gyud ko niini ni Papa kon mahibawo.” Naghilak si Estrella nga namulong.

Miabot ang higayon. Kon ang panahon tigdul-it og kasakit, tigdalit sad kining kalipay.

Usa ka adlaw niana nakaila niya si Cora. Matahom kini. Usa ka Certified Public Accountant. Buotan ug masinabuton. Dinhi nadani siya. Iyang gipadaygan. Mitangdo kini kay nahigugma sad diay kaniya.

Sa iyang nataran karon miulbo ang siga sa binantal nga mga suwat ni Estrella.

Nanglupad sa hangin ang mga aligato gikan sa mga papel nga nasunog. Naabog na gyud ang mga pulong bakak ni Estrella.

Unya iyang nakita nga nagdagan padulong niya ang iyang helper.

“Attorney, niay kwentas sulod ning suwat.”

“Imo na lang na, Rita.”

“Tinuod, Attorney?”

“Tinuod lagi. Imo na na, kay sa akong sunugon.”

Malipayon nga mitalikod ang helper. Ang bulawang kwentas hinatag ni Estrella kaniya atol sa iyang birthday. Wa kini niya masul-ob, iya diay kining gitaguan. Unya, may mihunong nga awto sa iyang gate. Nakita niya si Cora nga nanaog. Ugma na ang ilang kasal. Karong adlawa ang petsa, Hunyo 4, 2000, nasiplatan niya sa iyang relo. (KATAPUSAN)