Sugilanon: Kon asa paingon ang bul-og adto ako

Friday, March 12, 2010

Carmelo D. Lariosa
Panadtaran, San Fernando, Cebu

DIHA na si Badong sa tugkaran sa ilang payag. Hilom didto sa sulod niini ug nabanabana niya nga nangatulog pa ang iyang asawa ug mga anak. Ang gaasgaas sa banagbanag didto sa sidlakang bahin sa kalibutan mao karoy naigo sa iyang panan-aw.

Have something to report? Tell us in text, photos or videos.

Milingilingi si Badong ug nagmatngon siya sa iyang mga lihok.

Bisag layo kining ilang payag sa mga silingan apan kinahanglan nga maneguro siya kay sayod siya nga ang sama kaniyang tua na magtago-tago sa bukid kay miabin sa mga tawo nga dunay kahiubos sa gobyerno seguro gyung sikupon ug unya bilangguon sa usa ka dapit nga gitagana alang kanila.

“Badong!” tingog sa iyang asawa nga si Mayang. Diha kini magbarog sa may pultahan sa payag nga bag-o pang iyang giablihan.

"The Manny Pacquiao Blog". Click here for stories and updates on the Filipino boxing champ.

“Mayang,” ni Badong ug diha-diha miduol ug migakos sa iyang asawa. “Mayang, ang mga bata, kumosta sila?”

“Maayo man sila. Matag gabii maghisgot sila nimo kon anus-a ka mopauli dinhi sa ato,” kahilakon si Mayang nga migakos usab sa iyang bana. “May nangita nimo dinhi ug nagtuo ko nga mga kauban to sila ni Temyong…”

“Kumosta si Temyong?” hinay ang tingog ni Badong. Si Temyong iyang manghod ug usa ka sundalo. Nakatabang usab siya paggasto sa iyang manghod sa pagtungha niini apan wala magdugay, kay nakapasar man si Temyong sa pasulit sa Philippine Military Academy kun PMA. Ug dihang didto na kini sa Baguio wala na sila magkita.

Miabin si Badong nila ni Kumander Cesar nga suod niyang higala. Sa sinugdan wala dayon siya mosagop sa tumong sa iyang higala, apan sa dihang ang iyang manghod nga si Gualda napalgan nga wala nay kinabuhi sa daplin sa sapa nga naguhayguhay ang sinina, nikuyog siya sa hut-ong nilang Kumander Cesar.

“Kon makalugar ko, Mayang, akoy motapos sa kinabuhi sa naglugos ni Gualda. Dunay nakakita nga si Anselmo ang naglugos kang Gualda. Nagsalig kay heneral ang amahan niini. Gusto kog hustisya apan unsay nahitabo, Mayang? Di ba way nahitabo ug si Anselmo karon tua papuy-a sa Manila!” mikagot ang mga ngipon ni Badong.

“Ayaw kana pagbuhata, Badong, kay dili maayo sa usa ka tawo ang paghunos sa kinabuhi sa iyang isig katawo,” tambag ni Mayang. “Niadtong miaging adlaw nianhi si Temyong. Nahibawo siya nga si Anselmo ang nag-among-among sa inyong manghod. Nakita ko, Badong, nga mikunot ang iyang agtang ug may luha ang iyang mga mata. Sa dayon na niyang lakaw niingon siya nga bisan tungod na lang kaniya mobiya ka na sa pundok ni Kumander Cesar, kay lain kunong hunahunaon nga ang iyang maguwang usa ka rebelde!”

“Mayang, kon asa ang bul-og sa tubig sa katarungan adto ako magpaanud-anod…” Gilugakan paggakos ni Badong ang asawa. “Mayang, mosaka ko sa taas sa payag kay motan-aw ko sa atong duha ka mga anak…”

PANGILIN karon dinhi sa ilang lungsod. Ug nahiatol nga mipauli si Anselmo. Human sa misa sa pangilin, kalit may milanog nga buto-buto sa pistola, nagbawos-bawos. Nasayran ni Mayang nga si Anselmo ang gipusil ug natusaktusak ang lawas niini sa mga bala sa pistola. Nagmaskara kuno ang nipusil kang Anselmo.

Pagkaingon ugma nagkita sila si Badong ug si Temyong sa payag mismo nilang Badong ug Mayang.

“Noy Badong, patay na si Anselmo, busa dili na angay nga mobalik ka pa sa bukid. Wala na ang tawo nga maoy nakaingon sa imong pag-abin kang Kumander Cesar,” matod ni Temyong nga naglingkod samtang nagkupot og usa ka mascara. (KATAPUSAN)