Sugilanon: Mga tipaka nga halandumon

Thursday, September 2, 2010

Carmelo D. Lariosa
Panadtaran, San Fernando, Cebu

HUMAN sa ilang kasal nanamilit dayon si Nicolas kang Flordelis kay may tawag man siyang nadawat gikan sa kompaniya nga iyang gitrabahoan nga pa-reporton na siya didto kay ang usa ka buwan nga gipangayo niyang bakasyon natapos na. Tungod niini gibati og tumang kaguol si Nicolas kay gusto man unta niya nga palanaton pa nila ang ilang honeymoon ni Flordelis.

Have something to report? Tell us in text, photos or videos.

“Kon di ko mo-report, basig taktakon ko sa trabaho,” pasabot ni Nicolas.

Updates on President Benigno Aquino III's presidency

“Mao ba, Nick?” way kinabuhi nga namulong si Flordelis sa iyang bana. Alang kaniya dili siya buot nga mopahilayo dayon kaniya si Nicolas kay wala pay usa ka semana gikan sa ilang kasal.

“O, nganong subo man kaayo imong nawong, Flor?” giagbay ni Nicolas ang iyang tuong bukton sa abaga sa iyang asawa nga kahilakon na. “Kining akong paglakaw, Flor, alang man ni sa atong ugma ug sa ugma sa umaabot tang mga anak…!”

“Unya, anus-a ka man mobalik?” mitutok si Flordelis kang Nicolas ug nagkasugat ang ilang tinan-awan.

“Hangyuon lang nako ang among Boss nga modalikyat kog pauli sa katapusang buwan ning tuiga.” Wala motan-aw si Nicolas kang Flordelis. Dili siya gusto nga makita ang paglugmaw sa mga luha niini.

“Sige, pagbinuotan didto, Nick. Magpaabot ko nimo bisag ingon niana ang kadugayon.

Tawgi lang ko sa selpon o diba mag-teks lang ka aron pod makahibawo ko sa imong sitwasyon didto,” midip-ig si Flordelis kang Nicolas.

Gigakos ni Nicolas ang asawa ug nanulod sila sa kuwarto. Pagkaugma milarga si Nicolas paingon sa Dubai.

NAGMINGAW ang kalibutan ni Flordelis sukad nibiya ang iyang bana paingon sa Dubai.

Hinuon, nasabtan niya ang tumong sa iyang bana. Trabaho ang labing importante alang sa ilang ugma ni Nicolas.

Ug karon ang kahaw-ang na ang kanunay nga mibukot kaniya. Ug matag hapon kay sa daplin man sa baybayon nahimutang ang ilang balay, mosuroy-suroy siya kauban sa buotan niyang iro.

UNYA usa ka hapon dihang nagsuroy-suroy na usab siya sa baybayon, may usa ka tawo nga iyang nakaila dihang iyang nasugatan nga naglakaw subay sa puting bunbon nga misangko sa katunggan. Paglabay sa mga adlaw wala damhang nagkasuod sila.

Si Gino, usa ka magbabalak nga napakyas sa iyang gugma.

Misugilon nga kon dili pa tungod sa iyang balak dugay na siyang naghikog. Ug matag hapon magsulat og balak si Gino sa puting bunbon, apan inigtaob sa dagat ibanlas kini sa mga balod ngadto sa kawalaan. Ang mga balak gisulat sab ni Gino sa papel ug gihatag kang Flordelis.

“Ang akong bana tua sa Dubai,” tug-an ni Flordelis kang Gino. “Karong Disyembre pa siya mopauli…”

“Mahala ang imong bana, Flor, kay siya ang gihatag kanimo sa Diyos. Suwerte ka. Ayaw siya limbongi,” ni Gino nga milantaw sa layong lawod ug didto sa layo dihay mga sakayanon nga taliuli na.

“Ikaw, Gin, nganong naingon ka niini nga kanunay lang nagsubo?” nangutana si Flordelis. “Tungod ba sa giingon mong mabudhion nga babaye?”

“Mahal ko si Azucena,” ni Gino. Unya milakaw siya paingon sa katunggan hangtod wala na makita ni Flordelis.

Hinuon, may mga balak nga gibilin si Gino kang Flordelis, mga tipaka nga halandumon ug dili gyud malimtan ni Flordelis kay buotan si Gino. (KATAPUSAN)