Sugilanon: Mihilak ang iyang Valentina

Monday, February 8, 2010

LIMA na ka tuig ang gidugayon sa ilang relasyon ni Floresa, ug sa maong gidugayon wala siya magdahom nga magkabuwag ba diay sila. Niadtong miaging bulan pa lamang nga gibuwagan siya ni Floresa. Alang kaniya ni Rodel, kang Floresa lang niya hipalgi ang usa ka gugma nga dili kamaong magbudhi.

Mahal niya ang dalaga, ug sa tibuok niyang kinabuhi ug kalag tingali dili na siya mahigugma pag-usab og laing babaye, kay si Floresa lang ang gipili ug gipitik sa iyang kasingkasing.

Have something to report? Tell us in text, photos or videos.

Apan wala na silay relasyon; hingpit na gyud ang ilang panagbulag diin si Floresa gyud mismo ang nipabuhagay sa mga pulong nga putlon na nila ang ilang relasyon. Ug siya pa ang gibasol sa dalaga nganong naingon niini ang dagan sa ilang lima ka tuig nga pagminahalay.

“Dili na ko sa usa ka lalake nga way pagsalig nako,” matod ni Floresa niadto nga kahilakon. “Ug naa pay imong batasan nga subra ka kaayo kamadudahon…”

Click here for stories and updates on the Sinulog 2010 Festival.

“Apan, Floresa, naingon ko niini kay mahal tika, ug dili ko gusto nga duna pay laing lalake nga magmahal nimo…” Nagpakiluoy siya niadto. “Sabta ko. Ayaw intawon kog buwagi. Maluoy ka!”

“Seloso kang dako! Madudahon. Ug possessive pa gyud kaayo.

Unsa may imong gusto, dili na lang ko makigsulti og laing tawo?

Hasta akong mga higala nga sila George, Danny, Philip, Mark, Dindo ug uban pa, imong dudahan nga akong uyab. Naunsa man tawon ka, uy?”

“Pasayloa ko, Flor.”

“Unsa na kaha kon minyo na ta, no? Tingali, imo kong patyon kon makita ko nimo nga dunay gika-estorya. Trato pa gani ta, dili ka na gusto nga duna koy suod nga mga higala…”

“Flor, pasayloa ko. Dili na ni mausab,” kahilakon si Rodel nga nangayog ikaduhang higayon sa babaye nga iyang gipakamutya nga karon nakigbuwag na kaniya.

Wala motingog si Floresa. Unya milakaw si Floresa biniyaan si Rodel nga nasugmoy sa iyang gibarugan.

VALENTINE’S DAY. Mingaw karon ang sitwasyon ni Rodel kay wala na man siyay uyab. Si Floresa tua na sa laing nasod ug nagtrabaho sa kompaniya nga gitrabahoan sa iyang maguwang lalake.

Ang duha ka tuig nga milabay morag damgo lang alang kang Rodel.

Apan ang iyang handurawan ug kasingkasing nagpabiling naghandom ug nagpitik sa binuhat nga iyang gimahal hangtod karon. Sa kanunay iyang ipatugtog sa stereo ang ilang theme song nga ‘Somewhere my Love.’

“Gaw, suroy-suroy ta ron. Duna koy ihatag nimong chick,” matod ni Sonny Boy, suod niyang ig-agaw. “Valentine’s day god ron.

Aw, sayod man ko ba nga si Floresa pa ang naa sa imong kasingkasing. Pero, tua na man to sa layo, Gaw. Tiaw moy Amerika. Basin og duna na pod to siyay uyab didto…”

Wala motubag si Rodel. Unya, nakahukom siya nga magsuroy nga mag-inusara. Giadto niya ang suki niyang restawran nga maoy pirme nilang adtoan ni Floresa. Pag-abot niya didto ang witer nga nakaila kaniya misenyas. Didto siya molingkod sa lamesa sa usa ka suok.

Nakugang siya dihang iyang nasiplatan ang usa ka babayeng nag-inusara. Naghilak kini. Sa dan-ag sa sugang dagitabnon nabantang sa iyang panan-aw si Floresa. Misinta ang iyang diwa ug giduol ang babaye.

“Floresa, kanus-a ka pa niabot?” sukna ni Rodel. “Happy Valentine’s! Gimingaw kaayo ki nimo…!”

“Rodel, gusto tikang kalimtan, apan dili ko mahimo. Maong nia ko karon kay Valentine’s day. Gimingaw sab ko nimo!” ug mihilak si Floresa, ang Valentina ni Rodel. (KATAPUSAN)