Sugilanon: Nagusbat nga kaugmaon

Friday, July 30, 2010

Henry Y. Mañus
Basak-Iba, Lapu-Lapu City

GIKUTASAN si Fred niining buntaga. Nag-abot ang iyang gininhawa. Nagsugod na ang klase sa iyang paghiabot sa eskuylahan. Gikuot niya ang pughaw nga panyo gikan sa bulsa sa iyang karsones ug gipahiran ang singot sa iyang nawong.

Have something to report? Tell us in text, photos or videos.

Unya misulod siya sa ilang ‘classroom.’ Anaa pa siya sa ikatulong tuig sa hayiskol.

“Leyt ka na sab, Fred!” singgaak ni Ms. Lani Monte, ilang maestra nga dalagang guwang.

Updates on President Benigno Aquino III's presidency

“So…Sorry, Mam…” ni Fred nga may kahadlok. “Gitumod pa man god nako ang tuba nga abot ko sa pagpananggot ngadto sa akong suki.” Ug milingkod siya sa iyang lingkuranan nga nagluha ang mga mata gumikan sa gibating kaulaw kay gikataw-an siya sa iyang mga klasmet.

Human sa klase midiretso si Fred sa plasa nga nahimutang haduol lamang sa iyang eskuylahan aron magpahangin. Gibati niya ang kahuot sa iyang dughan ug buot niyang hupayon kini. Sa paglabay sa pipila ka mga gutlo may usa ka batan-ong lalake miduol kaniya. Yagpis ang panglawas niini ug mubo nga pagkatawo.

Bugoy ang pamorma niini kay may dako nga ariyos nga nagbitay sa usa ka dunggan ug may ariyos pa gayud sa kilay.

“Ako si Alvin, Bay…” paila sa lalake dayong tunol sa iyang kamot ngadto kang Fred. “May baligya kong tambal sa problema.

Mahanaw gyud dayon kanang problema mo kon matilawan mo kini.”

Mitutok si Fred sa lalake nga mitunol sa gamayng plastik ngadto kaniya. “W-Wala ra ba koy kuwarta, Bay,” matod ni Fred.

“Sige lang…” ni Alvin dayong pasok sa plastik ngadto sa bulsa sa polo ni Fred. “Unya na lang ang bayad.”

Sugod niadtong higayuna kanunay nang mopalit si Fred sa baligya ni Alvin. Ug miabot ang higayon nga nagumon si Fred niini.

Magpangita na siya kang Alvin. Buhaton na ni Fred bisan ang dautan aron lamang makasapi ug makapalit sa baligya ni Alvin.

Mangawat na siya. Manglabnig selpon. Manguot og pitaka.

Ug manulis na gayud. Naundang na siya sa iyang pagtungha.

USA ka adlaw niana kalit nga mibutho sa balay nila ni Fred ang grupo sa mga tinugyanan sa balaod. Gironda sa mga sakop sa PDEA ug nga pulis ang balay nila ni Fred. Gidakop si Fred kinsa natulog pa niadtong higayuna. Lakip nga gidala sa mga pulis ang pipila ka putos sa baligya ni Alvin nga iyang gipalit u gang pipila ka mga kahimanan sa paggamit niini.

Sa sulod sa bilanggoan nga nahimutangan ni Fred may namatikdan siya. Dunay usa ka binilanggo nga kauban da usab niya sa samang karsel nga daw buot molingkawas sa iyang mga mata. Namatikdan niyang motalikod kini sa matag higayon nga iyang tan-awon. Iya kining giduol.

“Hudas kaaa!!!” singgaak ni Fred dihang iyang nailhan ang tawo.

Giambakan niya kini ug gidabudabohan sa nagtuasik niyang mga kumo.

Wala hunongi ni Fred pagkulata ang tawo bisan pa man sa pagpugong sa kauban nilang piniriso. Nahisama siya karon sa usa ka tigre nga mibugno sa usa ka iring, kay taas ug dako man siyag lawas samtang ang tawo mubo ug niwang pa gayud. Naputos sa mga samad ug bun-og ang nawong sa tawo dihang miabot ang mga pulis.

“Ang pagkaguba sa imong nawong, Bay Alvin, dili pa igo nga ibayad sa nagusbat kong kaugmaon gumikan sa baligya mong ginadiling druga!” singgit ni Fred sa iyang hunahuna samtang nagtan-aw sa duguong tawo nga gidala sa mga pulis aron ibalhin.

“Paninglan ko pa ikaw sa umaabot nga mga adlaw!” (KATAPUSAN)