Sugilanon: Namista ang gugma

Wednesday, September 8, 2010

Mar O. Rabaya
Sarasota, Florida, U.S.A.

SABADO sa udto. Nag-atang og sakyanan sa Tabunok sila si Nesto ug Celia paingon sa Tapul kay mamista. Sumala sa gikasabutan adto sila mosaka sa balay sa iyaan ni Celia nga si Ya Fausta. Dalagang gulang si Ya Fausta ug kamanghurang igsuon sa namatayng amahan ni Celia. Sukad namatay ang ilang ginikanan ni Celia, si Ya Fausta maoy nakasunod sa karaang balay sa Tapul isip kabilin. Nagpuyo si Ya Fausta sa iyang balay
nga nag-inusara, apan kasarangan ang kahimtang. Wa maglisod.

Have something to report? Tell us in text, photos or videos.

Updates on President Benigno Aquino III's presidency

Sanglit nihit ang sakyanan paingon sa bukirang balangay sa Tapul labi na kay pista, napugos si Nesto ug Celia pagsakay sa habal-habal. Pag-abot nila sa eskina Tapul, mihunong ang habal-habal ug namaktas sila paingon sa balay ni Ya Fausta.

Bisan gikutasan unang miamen si Celia sa iyaan. Misunod usab si Nesto.

“Si kinsa man kining kaubang mo, Celia?” pakisayod ni Ya Fausta.

“Si Nesto, akong kauban nga maestro sa among eskuylahan, Tiya. Uyab sab nako siya.” Maulawong mipaila si Celia ngadto sa iyaan.

“Hmmmmm, mao ba? Na hala, pahiluna una mo sa lamesa samtang mag-asikaso ako sa inyong pagkaon!”

Nagkinidhatay si Celia ug si Nesto samtang nangaon.

Human sa prosesyon misunod ang disco nga nagsibaw lang ang sonata. Nagkiat lang ang sadsad sa mga batan-on lakip na ni Nesto ug Celia. Dihang hapit na ang tungang gabii ug gikapoy nag sinayaw si Nesto ug Celia nanggawas sa diskohan. Namauli ang duha sa balay nga giabtan.

Nahinanok na si Ya Fausta diha sa hawanan sa balay dihang miabot sila si Nestor ug Celia. Nagkinto sila paingon sa kuwarto nga giandam sa iyaan ni Celia alang kanila.

Diha sa giandam nga kuwarto nakita sa duha nga may taas nga unlan nga nagtunga sa ilang higdaanan. Ang taas nga unlan maoy nag-ulang kanilang duha sa ilang pagkatulog.

Nag-alindasay si Nesto sa iyang higdaanan samtang si Celia nahinanok gumikan sa kakapoy. Gihinol ni Nesto ang nagbabag nga unlan nga taas ug sa nag-alindanga nga pagbati milabang siya sa nagbabag nga unlan. Gigakos si Celia ug giukoban ang mga ngabil. Maoy nabatyagan ni Celia ang hugot nga gakos ni Nesto uban ang hunghong: “I love you, Celia…!”

Gianod sa wa hisabti nga pagbati ang dalaga nga maestro nga igo lang miingon: “Ayaw, Nesto… kay himat-an unya ta ni Ya Fausta!”

Apan hugtanon ang hangyo ni Nesto kang Celia. Ug lagi kay gugma sab ang nagsugo wa na makabalibad ang dalaga. Ug nalimot ang duha sa ilang kaugalingon.

Morag natay-og ang karaang balay ni Ya Fausta ug iyang namat-an ang inigot sa mga haligi ug salog. Nasabtan niya ang hinungdan human sab malantaw ang lawak nga gikatulgan nilang Nesto ug Celia.

Nabuntagan pagmata sila si Nesto ug Celia. Didto sa lamesa nagbuntaog ang pagkaon alang sa pamahaw nga giandam ni Ya Fausta.

“Maayong buntag, Ya!” hapit magkadungan ang duha sa ilang pangatahuran.

“Sige. Pamahaw una mo usa manggikan. Klase ra ba ugma!” matod ni Ya Fausta.

Samtang nangaon ang duha ka mamistahay may gipasabot ang iyaan ni Celia ngadto nila.

“Hapit unya kamo sa simbahan inigpauli ninyo…!” mipahimangno si Ya Fausta.

Nagtinan-away sila si Nesto ug Celia nga nakasabot sa pahimangno ni Ya Fausta nga igo lang mipahiyom. (KATAPUSAN)