Sugilanon: Napusoy si Masyong

Saturday, March 6, 2010

Bartolome Man. Panilagao
Lacaron, San Fernando, Cebu

“MAGPATULI kog usab, Pre Masyong kon di ka makadaog sa pagka konsehal ning umaabot nga piniliay sa bulan sa Mayo!” matod ni Goyong nga nagpasalig. Siya maoy nagdaldal kang Masyong nga palansaron isip konsehal ning ilang lungsod sa San Fernando.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

“Apan, Pre Goyong, makaseguro kaha ikaw nga modaog ko? Gawas sa akong pagka manananggot, igo ra ko nga makasulat sa akong ngalan. Labaw sa tanan usa ra ko ka ‘independente’ ug way partido nga gisandigan!” mikiwi ang mga ngabil ni Masyong nga namulong.

“Ayaw kabalaka niana, Pre Masyong, ako ray bahala og pangampanya kanimo!” pintok nga tinubagan ni Goyong.

Di ikaglimod nga ning balangay sa Balungag nga sakop sa San Fernando, way wa makaila kang Masyong, ilabi na niadtong mga suki niyang palainom og tuba. Tanlas kaayo nga imnon ang tuba ni Masyong. Di gani abtan og hapon ang tagurha niya ka kawit.

“Imbis, Masyong, nga magpalit kita og lab-as nga isda, magmantenir na man lang nuon kita adlaw-adlaw og tinughong sa atong pamahaw nga sulaan og amahong!” reklamo ni Noring.

“Antos lang una karon, Noring, kay kon ako makadaog ug mahimo nang konsehal, mahayahay na gyud kita, ug moundang na ko pagpananggot!” esplikar ni Masyong.

Sal-angan lang ang adlaw nga way dad-on si Goyong nga ilang silingan nga manghangyo og panabang.

“Pre Masyong, aniay taga Tinubdan manghuwam nimog salapi kay dad-on ang iyang anak nga kamanghuran sa ospital kay nasakit og dengue!”

Sa hunahuna ni Masyong naka-hearing tingali si Goyong nga nahalin ang iyang baka nga gatasan.

Ang nakapait kay matag bundak sa makusog nga ulan magkabasa intawon silang magtiayon, ilabi na sa tulo ka buok anak nilang Masyong ug Noring.

“Unsaon na man lang niini, Masyong, nga imbis ipalit unta nato og pawod sa nipa aron masungkipan kining busluton natong atop, nahurot na man hinuog huwam kadtong subra sa halin sa baka?” mihilak si Noring.

BISPERAS sa piniliay. Wa mahikatulog si Masyong nga naghayang. Miduaw kaniya si Goyong.

“Maglawig na gyud ang imong kadaugan, Pre Masyong, sa pagka konsehal!” ni Goyong.

“Unsa man tuod ang gianhi nimo karon, Pre Goyong?” sukna ni Masyong.

“Mangadlawon ko, Pre Masyong, pagtungas sa tanang balangay nga sakop sa San Fernando!” nagkanguhal si Goyong. “Isip imong sinaligang lider, kinahanglan nga magdala kog salapi aron akong iapud-apod sa mga katawhan nga lumalaban sa imong kandidatura!”

Sa hunahuna ni Masyong taas kaayo og antenna ang iyang kumpare kay tingali naka-hearing na pod nga iyang giprenda ang iyang yuta nga kalubihan.

Mahinamon nga nagpaabot si Masyong sa resulta sa piniliay. Unya mao na lamang ang iyang nahibaw-an nga wa diay ipanghatag ni Goyong ang salapi sa mga botante. Ug si Kumpare Goyong niya mismo wa diay mobotar kaniya.

Igo na lamang nangagho si Masyong nga mituaw, “Ako si Masyong … ang kandidato nga napusoy!” (KATAPUSAN)