Alcea Maningo
Cangyan, Carmen, Cebu

ALAS sayes sa buntag. Miyerkules. Nag-atang na si Marlon gawas sa pultahan sa Redemptorist Church. Namaligya siyag mga mantalaan. Ug nagsugod nag panggawas ang mga nanimba sa unang misa kun nobena alang sa Inahan sa Kanunayng Panabang.

May bana ug asawa nga naggunitay sa kamot nga migawas sa simbahan.

Nasinati na sila ni Marlon kay suki niya ang bana.

Sun.Star accepts donations for victims of Typhoon Ondoy

“Superbalita, Dong!” matod sa bana ngadtong Marlon. Gibuhian niini ang kamot sa iyang asawa. Mikuot siya sa tuong bulsa sa iyang karsones aron pagbayad.

Gitunol ni Marlon ang mantalaan human dawata ang bayad.

“Nganong Binisaya mang newspaper imong basahon? Mora kag way class ana. Mora kag way grado. Propesyonal ka, gradawado sa accountancy ug CPA. Nagtudlog accounting subject sa usa ka unibersidad. Unya Binisaya imong basahon? Dapat Sun.Star Cebu imong paliton!” matod sa asawa nga maisugon ang tunada sa tingog.

Mipahiyom og pino ang bana. Mibudlot ang simod. Mikunot ang agtang. Ug mibuka ang baba aron motabi.

Bisag daghang namalit sa iyang mga mantalaan nagpaminaw ug naniid si Marlon sa magtiayon. Sa hunahuna ni Marlon, “Mag-away man kaha ni sila bisag bag-o nga nanimba.”

Sa banabana ni Marlon singkuwentahon na ang pangedaron sa bana.

Ang tupi niini sama sa kang Derek Ramsay. Maskulado og panglawas. Ang T-Shirt nga gisul-ob mihaom sa iyang lawas.

Maong iyang karsones. Ang asawa pution og pamanit. Taason. Desenting manul-ob og bestida. Angayan nga mahimong modelo sa mga matrona.

“Ako nangambisyon sab sa batan-on pa nga mahimong magsusulat,” nadungog ni Marlon nga misulti ang bana. “Duna koy daghang sinulat nga manuskrito sa Iningles.

May fiction ug non-fiction. Daghan kog gisulatan nga mga publisher. Apan di sila intresado sa akong sinulat.

Ang uban nagkinahanglan og literary agent. Nagpasabot lang na nga kulang pa akong abilidad isip tagsulat sa Iningles. Busa nagpraktis kog sulat sa atong pinulongan. Basig mosikat ko sa atong pinulongan.

Inigsikat nako sa atong pinulongan, ayha pa ko mangambisyon nga mosikat sa pagsulat og Iningles. Para nako minaot nang kinaiya nga mangambisyon mosikat pagsulat sa Iningles, unya di gani kamaong mosulat sa atong pinulongan!”

Wala motingog ang asawa. Mipadayon silag lakaw paingon ngadto sa ilang kotse. Wa mag-away.

“Mao diayng paklion gyud niya dayon ang panid ss Kalingawan sa Super B. Nagsulat diay siyag mga sugilanon,” tuaw ni Marlon sa hilom.

Nahayagan si Marlon. Kasamtangan man god nga nagtungha siya sa kurso nga Journalism. Aron may makat-unan siya mahitungod sa pagpalakaw sa mantalaan, namaligya gyud siyag mantalaan. Bisag sa hayiskol pa siya working student na siya. Wa siya magsalig sa iyang ginikanan alang sa matrikula kay daghan silang managsuon.

Napulo. Ug siya ikaduhang anak, pero kamaguwangan nga lalake.

Nakaingon siya sa iyang kaugalingon nga sundon niya ang pilosopiya adtong suki niya nga nipasabot sa iyang kapikas kon nganong Binisaya nga mantalaan ang iyang gibasa. (KATAPUSAN)