Sugilanon: Sukdanan sa pagmahal

Saturday, September 4, 2010

Rodel C. Nuñeza
Maslog, Tabogon, Cebu

BISAN giunsa og sangpit si Jun Riel sa iyang inahan, wala gayud siya motingog.

Have something to report? Tell us in text, photos or videos.

Nagpatuso-tuso lang siya nga natulog gihapon. Naglain ang iyang buot ngadto sa iyang ginikanan, ilabi na gayud ngadto sa iyang amahan.

Updates on President Benigno Aquino III's presidency

Nadungog man god niya pag-ayo ang gipanagsultihan sa iyang amahan ug inahan sa sala nga duol ra sa kuwarto ni Jun Riel.

“Anhi na lang gyud nato paeskuylaha si Jun Riel sa ato inigsugod niya sa hayiskol. Total may hayiskol man diha sa lungsod.” Sulti sa iyang amahan ngadto sa iyang inahan.

“Ang buot mong ipasabot nga dili na lang nato siya patunghaon didto sa dakbayan, sama sa iyang maguwang?” gikan sa iyang inahan.

“Dili na. Anhi na lang nato siya patunghaa. Kasaligan man sab ang mga magtutudlo diha sa hayiskol. Maayo man sab silang manudlo,” matod sa iyang amahan.

“Aw, ikaw god ang mag-igo,” pahiuyon sa iyang inahan.

Mikalit lang og kalian ang buot ni Jun Riel niadtong tungora sa hukom sa iyang mga ginikanan. Dili na sa dakbayan siya motungha sama sa iyang maguwang nga si Josh nga anaa sa usa ka inilang tunghaan. Nakaingon siya nga dunay pinalabi ang iyang mga ginikanan. Si Josh.

Dako kaayo ang gusto ni Jun Riel nga adto siya sa dakbayan motungha kay bation man siyag garbo. Nagtuo siya nga mosikat siya kon adto tungha sa dakbayan.

“Uy, Jun Riel, naunsa ka ba? Nganong di ka man motubag? Nasayod ko nga nagmata ka na.”

Nabati ni Jun Riel ang tingog sa iyang inahan.

Napugos gyud sa pagbangon si Jun Riel gikan sa iyang gihigdaan. Ug sa pag-abli niya sa sera sa pultahan natukmaan niya ang iyang inahan.

“Ngano ba, Ma?” sukot ni Jun Riel.

“Hala, kaligo dayon. Unya pag-ilis. Inigkahuman natog pamahaw adtua ang imong maestro sa Grade Six ug kuhaa ang imong report card. Magpalista ka sa hayiskol didto sa lungsod.”

“Anhi diay ko ninyo pa-eskuylaha, Ma?” ni Jun Riel nga mikulismaot ang nawong, kunohay wa siya mahibalo sa hukom sa iyang mga ginikanan.

“Oo. Kay di buot si Papa nimo nga mahisama ka kang Josh nga nagpaluma-lumag eskuyla sa dakbayan, apan wa gyuy nahimo.

Nag-usik-usik lang sa among gigasto kaniya.”

Nahitiurok si Jun Riel sa gisulti sa iyang inahan. Karon pa siya masayod sa lakaw sa pag-eskuyla niini didto sa dakbayan.

Wala diay maayong resulta.

Ning higayuna nahigmata sa dakong kahimatngon si Jun Riel. Nasayop diay siya sa iyang pagtuo nga wala siya mahala sa iyang mga ginikanan.

Ang matuod nga hinungdan nganong dili na siya patunghaon sa iyang amahan sa dakbayan, kay dili kini buot mahisama siya sa iyang maguwang nga nagbinugoy sa iyang pag-eskuyla uban sa mga barkada. Dili makatugot ang iyang amahan nga masayang ang iyan g pagtuon, kay maoy gilantaw niini ang mahayag niyang kaugmaon.

Ug ning tungora naulian sa maayong buot si Jun Riel ngadto sa iyang mga ginikanan. (KATAPUSAN)