Sugilanon: Surambaw nga nasuhong

Monday, March 8, 2010

Rodel C. Nuñez
Maslog, Tabogon, Cebu

SAMTANG naghanip ko sa mga tinda sa among tindahan kalit lang nga nahibutho ang akong ig-agaw nga si Jundel. Nagbitbit kinig manok nga talisayon.

Have something to report? Tell us in text, photos or videos.

“Manari ka, Gaw?” gipangutana ko siya.

"The Manny Pacquiao Blog". Click here for stories and updates on the Filipino boxing champ.

“Oo. Manari mi ron sa Danawan. Pista god,” tubag ni Jundel. “Mao bitaw nga mihapit ko, basin og moabay ka.”

“Kaanugon da nga wala gyud koy kuwarta pagkakaron,” matod ko.

“Siyaro man sab. Kahubsan tingali ang atabay sa tubig, apan dili ang imong bulsa,” ni Jundel.

“Naa untay kuwarta, apan igkukompra man na sa Martes,” gidaygan ko si Jundel. Nakagusto ra ba gyud ko sa iyang manok, kay gawas nga espiso kining dugo, hamis ug sinaw kaayo og mga balhibo.

“Naa man diay igkukompra, di way problema. Total mahiuli ra man kanang imong puhonan. Makadaog ka pa,” ni Jundel nga nagsige og panglingi kon wala ba diha ang akong asawa nga masuko gyud kon bahin na sa sugal.

“Maayo lagi og modaog. Kon mapilde uroy. Di dakong gubat!” nako pa.

“Unsaon god nato pagkapilde nga maghimo man ta og milagro,” ni Jundel. Unya iya kong gipasabot nga ipaagi namo sa surambaw ang pagpanugal. Adto ko niya papustaha sa kontra unya sa iyang manok, kay mao kini ang mahimong ‘killer.’ Ang iyang manok maoy patyunon.

Nakumbinser ko sa akong ig-agaw. Mikuyog ko niya sa Danawan dili aron pagpamista kundili aron pagpamuwang.

Gihurot kog dala ang kuwartang igkukompra nga mikabat og tres mil pesos. Kini gitagana ko gayud para ipusta sa kontra sa manok ni Jundel. Dako ang akong paglaom nga makadaog gayud kining kuwartaha.

Tungod kay pinares laging daan, dali rang gitarian ang talisayon sa akong ig-agaw ug ang kontra niini nga ugis. Giparada dayon sila diha sa taliwala sa ruydahan nga hinimo sa mga kahoy ug kawayan.

Inilog ang talisayon ni Jundel. Pustorawo kaayo kinig barog kon itandi sa ugis.

Naghasi dayon ang masyadahay sa sulod ug sa gawas sa ruydahan. Duna pa ganiy naglugro alang sa talisayon. Miabot gani ang lugro og diyes-siyete.

Midawat dayon kog lugro. Diha ko mopusta sa ugis nga maoy kontra sa talisayon. Gihurot kog pusta ang dala kong kuwarta.

Puwerte nakong nakapahiyom kay sa primero pa lang gani nga panaglabok sa duha ka mga manok nalup-og dayon ang manok ni Jundel. Naghapa na lang kini sa yuta samtang gisigihan og labok sa ugis.

Apan kalit akong naminghoy dihang nakit-an ko gayud nga naunay ang ugis sa iyang kaugalingong tari. Maayong pagkatusok sa tari sa iyang ulo. Mikisi-kisi kini taliwala sa ruydahan.

Gipunit sa kuyme ang duha ka mga manok. Ug dayon gipatusik sa usag-usa. Mitusik ang talisayon bisan nagdungoy na lang kini.

Mitusik gani kinig katulo. Sa laing bahin wala gayud motusik ang ugis, bisan kon giunsa kinig dusmo sa kuyme ngadto sa talisayon.

Nagsige na lang kinig kisi-kisi hangtod mikakak.

Morag midat-og kanako ang tibuok kalibutan dihang mihukom ang kuyme nga ang talisayon gayud maoy midaog. Napilde ang manok nga maoy akong gipustahan.

Gipaningot kog maayo samtang nagkuot sa akong pitaka. Nagkurog ang akong mga kamot samtang nagkuot sa tres mil pesos aron ibayad ngadto sa akong gidawatan og lugro. (KATAPUSAN)