Sugilanon: Tungod sa damgo

Wednesday, March 17, 2010

Carmelo D. Lariosa
Panadtaran, San Fernando, Cebu

KARONG adlawa nasuntok ni Kadong ang bungbong sa ilang balay ug nakita niya nga ingon sa nasip-ak og gamay ang grano niini. Ingon gyud niini ang dali niyang mabuhat sa higayon nga saputon siya. Dihay kausa nasaksihan sa iyang asawa nga si Terya ang iyang gibuhat sa palid sa ilang bentana nga iyang gipukpok ug nabuslot pag-ayo ang dapit sa ibabaw.

Have something to report? Tell us in text, photos or videos.

“Dong, ayaw ingna ana atong bentana, uy! Tan-awa ra god dako na kaayo ang lungag sa ibabaw. Mosamot gyud ta kapobre ini,” hinay apan pintok ang pasabot sa iyang asawa.

Click here for Election 2010 updates

“Sori kaayo, Ter! Unsaon di na nako maagwanta ang kalisod nga atong gisagubang. Morag tinunto na ni sa kapalaran. Sayod ka gyud kon giunsa ta mo pagdala. Adlaw ug gabii sige kong kayod. Ug ang nahitabo wa gihapoy resulta. Makakuwarta man pero dali sang mahanaw. Atay ning kinabuhia! Ang atong duha ka anak pulos masakiton ug naundang pag-eskuyla!” Miakbo si Badong sa bentana, ug kahilakon siya.

“Pagsuway tingali ni sa Ginuo, Dong, ning nahitabo nato. Mag-ampo lang ta nga sa umaabot nga mga adlaw hatagan na ta sa Ginuo og kaharuhay sa pagpuyo.” Bugnaw ang tingog ni Terya.

“Ayaw na paghisgot anang Ginuo-Ginuo, Ter. Kay kon duna pay Ginuo, di unta ta maingon ini kalisod. Kanunay god kong nag-ampo.

Mosimba na man gani ko kada Dominggo!” Gipahiran ni Kadong ang mga luha sa iyang mga mata. Ginuo god, niya pa sa hilom. ‘Niadto pa kining akong pag-antos. Sa bata pa ko wa gyud ko kahinumdom nga nakatilaw mig kaharuhay sa among pagpuyo. Ang akong amahan gisugpa na lang sa pagtinarbaho ug ang akong inahan namatay kay nabanggaan sa trak de karga.’

Nakapanglingo si Kadong kay hangtod karon nga duna na siyay kaugalingon pamilya, pagsuway ba gihapon ang gibuhat kaniya sa Diyos? Mikagot ang mga ngipon ni Kadong. Wala na gani silay lung-agon ron kay wa na silay bugas. Wala nay magpautang kanila.

Ang iyang mga igsuon maglikay na kaniya kay lagi may utang siya kanila. Nangandoy siya nga makadaog unta sa Lotto aron iyang bayran ang tanan niyang mga utang. Apan unsaon niya pagdaog nga wa man siyay palit-palit og tiket!

Unya nananghid si Kadong kang Terya nga molakaw, pamasin nga makakitag kuwarta didto sa siyudad o di ba didto sa iyang mga barkada kaniadto nga adunahan na karon.

Karon naglakaw na siya subay sa dalan atbang sa simbahan. Sa iyang hunahuna nangandoy siya nga kuhaon na lang sa Ginuo. Dugay na baya siyang nangandoy nga mamatay, kay unsa pa may puy-an ning kalibutana nga iyang pamilya nag-ilaid sa kalisod. Dihay kausa nakahunahuna siyag paligis sa Bus aron kon bayran ang patay niyang lawas magamit kini sa iyang pamilya. Kanunay niyang giampo nga patyon siya sa Ginuo aron maimpas ang tanang problema. Dihay kausa nga nisuway siyag hikog, apan hiabtan siya ni Terya ug nasanta ang iyang buot buhaton. Ug karon kay wa gyud siyay nahimo mipauli na lang siya nga way dalang grasya alang sa iyang pamilya.

SA iyang pagkatulog may usa ka tawo nga miduol kaniya didto sa iyang damgo. Daw buhi ang iyang pagdamgo. Gidala siya sa usa ka dapit diin didtoy daghang mga tawo. May nailhan siyang mga silingan nga nangamatay na. Sila si Pitong, Isko, Mr. Boony, Adela, Karya ug uban pa.

“Sayo kana silang nangamatay ug wa pa kuhaa sa Labing Gamhanan. Ikaw, di ba gusto ka mang mamatay, Kadong?” nangutana ang tawo.

“Ha? Aw, gusto unta, apan nausab akong hunahuna…” ni Kadong.

“Maayo kay nausab imong hunahuna, Kadong,” matod sa tawo nga nagsul-ob og puting sinina ug tag-as ang buhok ug bangason. “Ugma ra ba gitakda nga mamatay ka sa ataki sa kasingkasing. Na hala, ayaw na pagsigeg hangyo nga mamatay ka. Ako ra bang nakita diri sa logbook nga sunod tuig mahimo kang Bilyunaryo!”

Nahipugwat si Kadong gikan sa iyang pagkatulog. Nanguros siya ug nangayog pasaylo sa Ginuo kay bisan og damgo ang tanan, alang kaniya tinuod ang iyang nakita.

Ang tawo nga iyang nakita mao si Hesukristo nga parehas sa larawan diha sa ilang kalendaryo. (KATAPUSAN)