Rodel C. Nuñez
Maslog, Tabogon, Cebu

NIADTONG unang panahon kanus-a ang mga hayop makamao pang mosulti, suod kaayo ang banog ug himungaan. Kanunay gayud silang magkuyog bisan asa. Kon hain ang himungaan atua gayud usab ang banog.

Ang ilang kasuod nisangpot sa ilang panaghigugmaay. Ang banog nahigugma sa himungaan. Ang himungaan nahigugma sab sa banog.

For updates from around the country, follow Sun.Star on Twitter

“Ikaw da gyud akong higugmaon,” nanaad ang banog ngadto sa himungaan.

“Banog, way laing makatag-iya nako, ikaw lang,” matod sa himungaan.

Apan ang ilang panaghigugmaay wala maayuni sa ilang mga ginikanan. Dako kaayong supak ang ilang mga ginikanan sa ilang panaghigugmaay. Kay managlahi ang ilang kahimtang. Ang banog nalakip sa pamilya sa mga langgam nga halangdon. Ang himungaan nalakip sa ubos nga katilingban sa mga pak-an.

“Di gyud mahimo nga si Himungaan maoy mahimo nimong kapikas,” masuk-anong namulong si Tatay Banog. “Hinangad kita sa atong katilingban, Banog. Daghan sa atong kamatang nga mga maanyag kaayo, nganong di sila ang imong pilian?”

“Bitaw, anak. Naa si Inday Banog sa pikas pangpang. Adtoa siya ug daygi sa imong gugma,” salga ni Nanay Banog.

“Apan, Tay, Nay, gibihag na ni Himungaan ang akong kasingkasing!” nangatarungan si Banog.

Sa laing bahin gikasab-an si Himungaan sa iyang mga ginikanan.

“Himungaan, di na mi gusto nga makigkuyog ka kang Banog,” pina ni Tata Manok. “Mga daugdaugan ang pamilya ni Banog.”

“Tinuod kana,” saling-it ni Nanay Manok. “Daghan sa mga piso sa atong mga silingan gipangdagit sa kadugo ni Banog.”

“Di mahimo nga buwagan ko si Banog,” ni Himungaan. “Nakasaad ko niya nga siya ray akong higugmaon.”

Tungod sa pagbabag sa ilang mga ginikanan sa ilang panaghigugmaay, talagsa na lang silang magkakuyog ug talagsa na sab nga magkakita. Kon magkita man
gani, kinawat-kawat na lang.

Agi og pagmatuod sa iyang gugma gihatagan sa banog og usa ka singsing ang himungaan. Ilang kinuptanan.

“Ampingi ning singsing kay timaan sa akong gugma kanimo,” matod ni Banog.

“Oo, Banog, tipigan ko pag-ayo,” ni Himungaan.

Apan wala damha nawala ang singsing. Mao kadtoy sinugdanan nga nagkabangi sila. Nagduda ang banog nga gituyo sa himungaan ang pagkawala niini. Nakakita tingali ang himungaan og laing hinigugma. Tingali usa ka ambungang sunoy. Tungod niini nagkabuwag sila sa hingpit. Dili na gani sila magtinagdanay.

Usa ka higayon nagkakita ang banog ug ang himungaan.
Gustong bawion sa banog ang singsing.

“Iuli kanako ang singsing kay di na ko makigkita pa nimo!” masuk-anon ang banog.

“Nawala lagi ug wa pa nako makit-i!” miputak ang himungaan.

“Basig gihatag nimo sa sunoy nga imong silingan!”

“Wa, uy! Tinuod gyud nga nawala.”

“Kon di kini mahiuli nako, may dautang mahitabo kanimo ug sa imong kaliwatan!” mibahad ang banog.

Naguol kaayo ang himungaan. Naglibog kaayo siya kon asa gayud pangitaa ang singsing. Wala man gyud siya makahinumdom kon diing dapita kini matagak. Mao nga nanimpalad siya kanunay.

Matag pundok sa mga sagbot nga iyang maagian, iya gayud kining ukayon, namasin nga Makita na niya dinhi ang singsing.

Kay wala man gyud makit-i ang singsing, ang banog kon makahigayon managit og piso sa himungaan. Ang himungaan sab way hunong sa pagpangita sa singsing. (KATAPUSAN)