Carmelo D. Lariosa
Panadtaran, San Fernando, Cebu

DIHANG gimanghuran si Joy og usa ka batang lalake morag didto na ang atensiyon sa iyang papa ug mama sa iyang manghod. Siyam pa ka tuig iyang edad. Grade Three pa. Kaniadto sa wala pa siyay manghod buhong kaayo siya sa mga duwaan nga pinalit ni Papa Luis. Matag abot sa iyang birthday mag-order dayon og mga ballon ang iyang Mama Cora. Dunay cake ug huypon niya ang mga kandila niini. Dayon mamakpak ang inimbitar nga mga bata. Manganta silag ‘Happy Birthday.’ Mosamot ang iyang kalipay.

"The Manny Pacquiao Blog". Click here for stories and updates on the Filipino boxing champ.

Apan karon nga duna na siyay manghod morag dili na parehas sa una nga anha gyud ang tanang pagtagad sa iyang papa ug mama kaniya.

“Hu,hu,hu, sumbong tika mama do, Ate Joya ka,” naghilak si Dodong Rey. Giaway ni Joy kay gibali ang iyang bolpen. “Sakit ayo ako dunggan imo kusi, hu,hu,hu…”

“Sige, sumbong gani ka, iniglakaw nilang papa ug mama ako tika bunalan og tukog,” ni Joy nga naglagot sa iyang manghod nga sumbongero.

“Ngano imo man ko pirme awayon, Ate?”

“Lagot ko nimo!”

“Ngano lagot man ka ako?”

“Basta lagi, naglagot ko nimo!”

Nianang pagkagabii giduol si Joy sa iyang Mama Cora. Gikasab-an si Joy. “Nganong imo mang gikusi si Dodong Rey, ha, Joy?”

“Iya man giputol ako bolpen, Ma,” rason ni Joy.

“Para kana ra. Ikaw gyud, no, di ka mosabot sa imong manghod. Sipat ka pod kaayo!” Gilusi ni mama niya ang iyang dunggan.

“Ayaaayyy… ayaaayyy… sakit ako dunggan, Ma, uyyy!” mihilak si Joy. Midagan paingon sa kusina.

Kay kusog ang paghilak ni Joy nakamata si Dodong Rey nga nag-edad pag singko.

Pagkabuntag gikasab-an si Joy sa iyang Papa Luis. Gibati na siyag kahiubos sa gibuhat sa iyang papa ug mama kaniya. Nakita niya nga nag-ilis silag sinina.

“Asa man mo, Pa, Ma? Nganong inyo mang giilisan si Dodong Rey?” ni Joy.

“Adto mi sa ospital, Joy. Among ipa-check up si Dodong Rey kay gihilantan ug dili na mokaon,” tubag ni Mama Cora. Subo ang nawong.

“Init kaayo ang imong manghod, Joy. Kagabii hapit siya na-kombulsyon,” sulti sa iyang Papa Luis.

Karon gibati na si Joy og kaluoy sa iyang manghod. Iya kining giduol nga naghigda sa katre.

“Gihilantan diay ka, Dong?” ni Joy nga mihikap sa agtang sa iyang manghod.

Miyango si Dodong Rey. “Ate Joy, inig-uli namo papa ug mama, duwa unya ta, ha…”

“Oo, Dong Rey. Inig-abot nimo gikan ospital, magduwa tag siklot.”

“Sige, Ate, duwa unya ta. Tudloi ko duwa siklot, ha!”

Miyango si Joy.

DIHANG nakalakaw na sila Papa Luis, Mama Cora ug Dodong Rey, gibati ni Joy ang kamingaw sa iyang manghod. Siya na lang usa karon sa balay kay Sabado man ron. Way klase. Unya nanaog siya sa silong. Nanguha siyag gagmayng mga bato. Inig-abot unya ni Dodong Rey kuyog sa ilang papa ug mama, tudloan dayon niya kinig siklot. (KATAPUSAN)