Sugilanong Pangbata: Bayad sa kabuang ni fred

Wednesday, September 1, 2010

Henry Y. Mañuz
179 Basak-Iba, Lapu-Lapu City

NAGPUNAY og katawa si Fred bisan nag-inusara siya sa sulod sa taksi nga iyang gidrayban usa ka buntag niana. Hilabihan niyang himuota nga naghunahuna sa usa ka tigulang nga lalake nga nalukapa sa aspaltadong karsada sa lungsod sa Catmon.

Have something to report? Tell us in text, photos or videos.

Naglakaw ang tigulang sa tunga sa karsada nga daw nakatag-iya og highway. Mipasirbato na si Fred sa taksi apan daw bungol kini ug wala gayud makadungog. Busa gipakusgan ni Fred ang dagan sa taksi ug gitumban dayon ang preno niini dihang nahiabot na duol sa tigulang. Milayat intawon sa kakuyaw ang tigulang maong nalukapa. Mipadayon pagpadagan si Fred sa taksi nga daw walay nahitabo.

Updates on President Benigno Aquino III's presidency

Nianang pagkagabii didto na usab si Fred sa balay sa babaye nga iyang gipangulitawhan.

Halos matag gabii nga mamisita siya kang Lucy. Alang kaniya si Lucy lamang gayud ang bugtong babaye sa kalibutan. Dulot sa bukog ang gugma niya sa dalaga. Apan kanunay siyang balibaran niini. Unsaon nga daw inayran sa kapalaran ang hitsura ni Fred.

Buliskad ang iyang ilong, tambok ug mubo siyang pagkatawo ug itom pa gyud ang pamanit nga halos din a makita inigsalop sa adlaw.

“Maluoy tawon ka nako, Day Lucy. Naupos na tawon kining akong sapatos pagpunay kog anhi sa inyo. Sugta na intawon ko, Day!” ni Fred dihang miatubang na kaniya si Lucy. “Sugton gani ko nimo pakaslan ta dayon ka. Bisan ugma dayon… mor pa!”

“Pastilan baya nimo, Fred…” gahi ang tingog ni Lucy.

“Gisultihan ta na ka nga wala koy gugma nimo! Unsaon lud-on man kong magtan-aw sa imong hitsura!”

Miduko si Fred. Naanad na siya sa mga pulong ni Lucy. Nahilom siya ug naghinuktok.

“Ang tinuod, Fred, gibati na baya kog kaluoy nimo,” ni Lucy ngadtong Fred nga nagtungok.

“K-Kon mao kana, Day Lucy, may paglaom na diay ko!” naulian si Fred ug mipahiyom.

“Mao kana, Fred. Ug karon gisugot na tika!” tuaw ni Lucy dayong barog aron makalikay sa mga kamot ni Fred nga buot nang mogakos kaniya. “Ug gusto ko nga magpakasal dayon ta. Atong adtuon ug kuhaon ugma si Lolo Binog sa Catmon kay gusto kong naa siya inigkasal nato.”

PAGKAUGMA miadto dayon sila si Fred ug Lucy sa Catmon aron kuhaon ang apuhan sa dalaga. Luwan sila sa taksi nga gidrayban ni Fred.

Human sa pipila ka gutlo nga biyahe nahiabot sila sa balay ni Lolo Binog nga nahimutang daplin sa karsada. Dihang nanganaog na sila si Fred ug si Lucy kalit lang may tigulang lalake nga nagdagang misulod sa balay. Unya migawas kini nga nagbitbit na og sundang nga mikidlap sa kahait.

“N-Naunsa ka, Lo?” sukna ni Lucy sa tigulang kinsa mao diay ang apuhang si Lolo Binog.

“Buot ko niyang paligsan gahapon, Day Lucy!” ni Lolo Binog dayong dasmag kang Fred ug miwara-wara sa sundang. “Patyon tikang animala ka!”

Apan mihunat pagdagan si Fred pahilayo sa nahimutangan ni Lucy ug ni Lolo Binog.

Gibiyaan ang taksi nga maoy gipahimungtan ni Lolo Binog sa dala niyang sundang. KATAPUSAN)