Suns midaog sa gubot nga duwa batok Pacers

Sunday, March 7, 2010

MIKABKAB og 30 puntos si Amare Stoudemire, nga maoy iyang ikatulong sunodsunod nga higayon, sa dihang gipukan sa Phoenix Suns ang Indiana Pacers, 113-105, kagahapon alang sa ika-1,900 nga kadaugan sa franchise history sa duwa nga gihamok og duha ka away ug walo ka technical fouls.

Nagsugod ang kainit sa duwa sa nahabiling 46.7 segundos sa third quarter sa dihang si Earl Watson sa Pacers mitukmod ni Channing Frye sa Suns. Si Danny Granger sa Indiana mihapak usab ni Frye kinsa misumbalik usab og labyog sa iyang kamot.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

Niapil usab sa lamoklamok sila si Roy Hibbert sa Pacers ug si Jason Richardson sa Suns ug ang duha uban ni Granger gipahamtangan og technical fouls. Kaduha usab pahamtangi og technical fouls si Frye ug otomatikong gipagawas sa korte.

Sa pagbalik sa duwa, si Granger perming gi-boo sa mga tawo sa matag higayon nga anaa niya ang bola.

Nagkainitay usab sila si Josh McRoberts sa Indiana ug Louis Amundson sa Phoenix sa tungatungang bahin sa second period. Ang duha pulos gi-technicals.

Sa sayong bahin sa fourth quarter, si Indiana coach Jim O’Brien ang gipahamtangan usab og technical fouls human nakiglalis sa mga officials.

Sa kadaugan si Grant Hill midugang og 22 puntos, si JasonRichardson mipakli og 20 ug milangkat usab og 10 ka rebounds.

Sa laing duwa, imbis si LeBron James ang giatngan sa kadaghana, ang rookie nga si Brandon Jennings nga nagpapuwa sa iyang buhok nga mora na hinuon siya og manok maoy nikuha sa atensiyon.

Ang 20 anyos nga pointguard mitali og 25 puntos sa dihang gipakaging sa Milwaukee Bucks ang Cleveland, 92-85. Si James igo rang nagtan-aw nga naglingkod. Matod ni coach Mike Brown nga igo lang niyang gipapahuway si James ug iya kining paduwaon kon kini gikinahanglan na gyud og maayo.

Posibleng di usab kini niya paduwaon batok sa San Antonio ugmang adlawa.