Suspects sa gang rape pagpatay, nadakpan

Thursday, March 18, 2010

MGA suspek sa pag gang rape sa 16 anyos nga dalaga ug pagpusil patay sa iyang boyfriend sa hinapos sa miaging semana nasikop sa sunodsunod nga operasyon sa kapulisan sa dakbayan sa Lapu-Lapu.

Nasayran nga giunay sa upat sa pito ka mga suspek ang mga biktima nga pulos ra mga sakop sa Crips gang.

Have something to report? Tell us in text, photos or videos.

Click here for Election 2010 updates

Hinuon, matod sa usa ka taho sa sibyaanang dySS, pipila sa mga suspek mga sakop sa Bloods gang, apan niuban sa lider sa Crips niadtong higayuna aron di sila mahilabtan.

Ang hepe sa Lapu-Lapu City Police Office (LLCPO) PSSupt. Mariano Natu-el Jr. nagkanayon nga way undang ang iyang mga sakop sa pagpahigayon sa follow-up operation human sa krimen niadtong Dominggo sa kaadlawon.

Human sa krimen, iyang gipatawag ang iyang mga sakop sa usa ka tigom ug iyang gihatagan og usa ka semana nga tagal sa pagsulbad niini.

Sumala pa ni Natu-el nga sa ilang pag-imbestigar sa dalaga nga biktima, nakatug-an kini og ngalan nga Toni.

Nadunggan kini sa biktima gikan sa kauban sa usa usa mga suspek sa ilang pagbiya human sa pagpanglugos ug pagpusil kang Rusell Booc, 16.

Sa ilang pagsubay sa dapit, ilang nailhan si kinsa si Toni, sakop sa Bloods gang, taga brgy. Bangkal.

Nitug-an sab kini sa mga ngan sa iyang mga kauban hinungdan nga nasikop nila ang tanang mga suspek sa sunodsunod nga mga operasyon nga nagsugod sa miaging adlaw hangtod kagahapon sa kaadlawon.

Nipasabot ang opisyal nga wa makaklaro ang dalagita sa panagway sa mga suspek nga nitabang niya og lugos ug nipusil sa iyang hinigugma kay nagtaptap man sa ilang mga nawong ginamit ang blue nga panyo.

Asoy sa biktima nga nisangpit ang usa ka suspek nga niingon nga “Lakaw na Toni, patay na na (Booc).

Nasikop ang laing unom ka mga suspek nga naglakip sa leader sa Crips gang nga si Jeffrey Cabilao, alyas Saddam, 19, taga-Saac 1, barangay Buaya, dakbayan sa Lapu-Lapu.

Si Cabilao maoy gitudlo sa iyang mga kauban nga maoy nipaum-om sa sumbohan sa armas ngadto ni Booc dayon gipusil patay.

Laing suspek ang naila nga si Joel Ramirez, alyas Boscalo, 19, taga-sityo Dumpsite, Bankal, Lapu-Lapu City nasikop uban sa pulos mga menor de edad nga mga lalake.

Matod pa ni Natuel nga naghiusa ang grupo sa Bloods ug Crips gang human nianang buntag sa adlaw sa Dominggo nakighigala ang Bloods gang tali sa grupo ni Cabilao.

Ang barangay Buaya maoy balwarte sa grupo sa Crips ug buot sa mga sakop sa Bloods nga mangaligo sa baybayon sa maong barangay.