Undo Tabian
Sa biya, Sa inilog

NAKADAWAT ko og pipila ka mga pangutana bahin sa panghigot, ug kasagaran niini gikan niadtong mga batan-on nga buot mosulay paggalam og manok para ibuwang.

Ang buot ipasabot niini mao nga ang nangutana kon wa pa makasugod og panghigot, wala pa gyuy kasinatian sa pagpanghigot. Ug kon aduna na kini hiniktan, wala gyuy kasayuran unsa ang angay niyang buhaton aron makabaton siya ug mga maayong hiniktan.

Sun.Star accepts donations for victims of Typhoon Ondoy

Kaniadto sa pagsugod nako og panghigot, dinha nay diyutay nakong nahibaloan bahin sa paggalam ug manok tungod kay namuhi man ko’g mga manok alang sa kusina, sa ato pa mga manok nga ihawnon. Kay ang akong amahan, isip usa ka magtutudlo, supak gyud sa sugal.

Ug ang buwang, sa iyang hunahuna, mao gyuy usa ka karaang bisyo sa Pilipino nga angayan sumpoon, ilabina gyud kon mga bata ang mosulod niini nga wa pay pangita.

Mao kadto nga naglikay gyud ko mahibalo-an sa akong amahan nga nanghigot ko og manok. Apan panahon man kadto sa ikaduhang Kagubot sa kalibutan. Busa, aron paglikay sa mga Hapon, mihiklin mi didto sa Labagan.

Ug didto ko namuhi og manok nga ihawnon. Nagsugod lang ko og duha ka himongaan, apan sa pipila lang ka bulan, daghan ang akong mga manok. Dinhi sab ako makahigayon pagpanghigot sa tago.

Sa paghimatngon pa ni Tatay Isyong, duha na ang akong hiniktan, ug nakabuno na ang usa. Gilat-an namo ang bihag nga wala siya mahibalo unsang manoka kadto. Iyang pagtuo, usa lang kadto sa mga manok sa tugkaran nga akong giihaw. Hilabihan nga higop ni Tatay sa sabaw sa bihag, nagtulo gud ang iyang singot. Apan wa gyod makapugong kadto si Nanay nga may pagkamalditahon ug usa usab ka maestro, pagsungog ni Tatay.

Wa man gud to mosupak siya nga manghigot ko kay si Tatay Moises, iyang amahan ug akong apuhan, nanghigot man ug mamuwang sab. Giingnan niya si Tatay Isyong nga nagkadusingot ug hinigop sa sabaw sa bihag:

“Gisingot ka Isyong, makasingot gyud ning sabaw sa bihag no?”

Mitingkag ang dunggan ni Tatay, “unsay bihag?, misinghag siya. Matod pa ni Nanay, “Kana imong gikaon, nakabihag man ang manok sa imong anak”

Mitan-aw si Tatay nako. Miduko ko, ug wa gyod motingog. Dugay nga mitutok si Tatay nako, samtang sa akong pagpasiplat ni Nanay, nakita nako nga hilabihang ngisi niini.

Apan paglabay sa pipila pa gyud ka gutlo nga tan-aw ni Tatay nako, nangigham siya ug mibalik paghigop sa sabaw nga nag aso-aso pa. Ug sukad niadto, wa na gayod ko makadungog nga mohisgot pa si Tatay bahin sa akong pamuwang, labi nag makabihag.

Busa, alang naidtong buot manghigot ug mamuwang, walay tunghaan alang niini. Matod pa sa Iningles pa, you just have to play it by ear. Sa ato pa, paniid lang sa gibuhat sa uban. Paniid lang sab sa kasinatian nga naagian na sa mga malampusong silingan.