DEAR Noy Kulas,

Itago lang ko sa ngalang Vivian. Akong iasoy kanimo ang kabahin sa akong karelasyon karon kon maayo ba kini. Usa siya ka vice mayor sa among lugar, adunay asawa ug tulo ka mga anak.

Ang estaroya man gud ani, nagsige ko og uli sa Pilipinas. Usa ka higayon, nagkita mi sa akong establishment. Adtong tungora bag-o pa ko napakyas sa akong uyab. Di na gani unta ko manguyab tungod sa hitabo sa akong lovelife. Adtong tungora nagsugod among panag-amigohay. Tungod sa iyang kabuotan ug masinabtanon nga pagkatawo, nalukmay gyud ko niya. Siya pod ang dalan nga nakalimtan nako ang sakit nga kagahapon.

Hangtod sa dugay na namong panag-uyab, nailhan ko ang iyang pagkatawo. Siya pod mismo niingon nga naa sa laing nasod ang iyang asawa ug wa na silay maayong komunikasyon ug wa na pod daw siyay plano nga mag-uban pa sila. Aduna siyay mga nadungog nga maong di na mouli sa Pilipinas ang iyang asawa tungod kay aduna nay lain.

Iyang gipadad-an og suwat nga mo sign kay magpa-annul siya sa ilang kaminyuon. Apan wa gipanumbaling sa iyang asawa. Tulo na mi katuig nga nag-uyab. Gani nabuntis ko pero akong gipalaglag kay basin makasuhan mi. Gusto niya pakatawhon apan ako ang nibabag. Sa pagkakaron nagsabot mi nga mag-uban kami ug di na gyud maglagyo.

Ang pangutana, kon angay ba nga sundon namo ang among gibati ug mouban kaniya? Three years nang wa niuli ang iyang asawa. Matod pa, gibaliwala na gyud daw siya sa iyang asawa. Bisan gani suporta sa mga anak, wa gani daw mosuporta bisan singko sintabo na lang. Mahal nako siya. Gusto pod unta ko nga mag-uban na mi kay lagyo kaayo mi ug gusto kong mouli nalang sa Pilipinas ug magminyo kaniya. Tambagi ko unsay angay nakong buhaton. Angay ba kini? Unsay dapat namong buhaton? Tambagi intawon ako.

VIVIAN

Vivian,

Wa may dautan kon magminyo basta ma-annul na ang ilang kasal. Konsultag lahi nga abogado ug ipangutana ang kabahin sa inyong relasyon ug possibility sa iyang pagpa-annul sa kasal. Mas maayo man gyud nang dunay laing legal opinion aron mas magiyahan ka sa imong desisyon.

Wa unta nimo ipakuha ang bata tungod kay kinabuhi to maoy imong gikutlo. Ang abortion ra ba dunay di maayong epekto sa panglawas, gawas nga kini kuyaw sa imong kinabuhi. Kini gawas sa spiritual dimension diin duna kiniy bati nga epekto sa imong pagkatawo.

Di gyud maayong magpuyo mo nga di pa siya libre kay makiha man gyud mo sa iyang asawa. Gawas pa, siya ra ba ang imong source sa information sa iyang
pagkatawo? Wa na ba gyuy lain pa? Kay basin baya duna say laing hinungdan nganong wa na mobalik pa ang iyang asawa. Ilha una siyag maayo sa di ka pa mohimog lifetime decision.

NOY KULAS