USA sa mga tawo sa mayor sa lungsod sa Carmen, Sugbo gipusil patay sa upat ka mga tawo nga sakay sa duha ka mga motorsiklo kagahapon sa may brgy. Poblacion West.

Natusak sa mga bala sa .45 kalibreng pistola ug .380 caliber pistol ang lawas ni retired police Nonito Taoy, 62, kanhi sakop sa intelligence unit sa kapulisan sa Sugbo.

Sun.Star accepts donations for victims of Typhoon Ondoy

Si Taoy maoy supervisor ug inspector sa M1 Security Agency, nga nagbase sa lungsod sa Carmen ug iya ni Mayor Sonia Pua.

Wa isalindot sa kapulisan sa lungsod ingon man sa mga opisyal nga may labot sa pulitika ang hitabo labina kay siya nailhang tawo sa mayor.

Niadtong Mayo 14, 2007, si Taoy usa sa mga tawo ni Pua ug ni anhing Carmen Mayor Virgilio Villamor, giingong gidagit uban sa laing tulo ka mga kauban sa hitabo nga giisip sa kapulisan nga may kalambigitan sa 2007 elections.

Gibuhian ra sab sila si Taoy ug mga kauban sa giingong mga tawo sa usa ka pulitiko sa 5th district.

Si SPO1 Danilo Laurente sa Carmen police niingon nga si Taoy nigawas sa M1 Security Agency dihang gisabayan sa upat ka mga gunman.

Matod sa mga saksi nga ang mga angkas maoy nipusil kang Taoy sa makadaghang mga higayon hinungdan sa iyang hinanaling kamatayon.

Wa magtaptap ang mga mamumuno, apan way bisan usa ka lumolupyo nga nakaila kanila.

Usa sa mga gunman gihulagway sa mga saksi nga nagsul-ob og brown nga jacket, itom nga t shirt ug nag-short pants.

Human sa pagpamusil, nipadung sa Danao city ang mga mamumuno, nga daling gigukod sa kapulisan sa lungsod, apan wa na gyud maapsi.

Napalgan sa kapulisan sa crime scene ang upat ka mga kabhang sa .45 kalibreng pistola ug .380 pistol.

Si Carmen Councilor Antonio Awing, tsirman sa committee on peace and order, niingon nga wa nila gisalindot nga may kalambigitan sa pulitika ang hitabo.

Matod ni Awing nga niabot sa brgy. Canamucan, Compostela ang ilang mga pulis sa paggukod apan wa na maapsi pa ang mga mamumuno.

Iyang giawhag ang kapulisan sa pag-imbestigar og maayo sa hitabo.

Posibleng magpatabang sila sa Criminal Investigation and Detection Group (CIDG) 7 o National Bureau of Investigation (NBI) 7 kon gikinahanglan.