Team Philippines pakyas

Monday, February 8, 2010

GIPAKYAS sa Great Britain ang Team Philippines sa finals, 4-1, kagahapon sa 1st World Team Championship sa Hannover, Germany.

Ang mga Pinoy, nga nalakip sa labing gikahadlukan sa tibuok kalibutan sa duwang billiard, mao untay unang nakapuntos dihang midaog ang panagpares nila ni Dennis Orcollo ug Warren Kiamco batok nila ni Karl Boyles ug 2007 world pool champ Darryl Peach sa premirong 8-ball doubles, 6-1.

Have something to report? Tell us in text, photos or videos.

Click here for stories and updates on the Sinulog 2010 Festival.

Apan gitabla dayon sa British ang panagparang pinaagi sa 6-1 nga kadaugan nila ni Darren Appleton ug Mark Gray batok nila ni Ronnie Alcano ug Marlon Manalo sa ikaduhang 8-ball doubles.

Ang maong kadaugan maoy nakapabalik sa kadasig sa British, nga ningharos na pagdaog sa nagsunod nga mga kombati.

Nagkinahanglan lang og 45 minutos si Gray sa iyang 8-2 nga kadaugan batok kang Antonio Lining sa 9-ball singles.

Si Boyes nisubay og makuyaw nga dalan apan nakamaneho gihapon kini pagpukan kang Lee Van Corteza, 8-7, sa laing 9-ball singles event.

Ang 2009 World Pool Masters champion nga si Appleton maoy naghingpit sa kadaugan sa Great Britain pinaagi sa dominanteng kadaugan batok kang Orcollo, 7-1, sa 10-ball event.

Sakitsakit gyud ang kapildihan alang sa mga Pinoy kay ilaha man untang gisiruhan ang Great Britain, 4-0, sa 1st round.

Paingon sa finals, nagdominar gyud ang mga Pinoy ug ilang gipanglampaso ang Czech Republic, 4-1, sa 2nd round, Norway, 4-2, sa Last 16), Poland, 4-2, sa quarterfinals, ug Russia, 4-1, sa finals.

Apan sa finals, nagkaguliyang na gyud ang mga Pinoy.