NALANGAN ang pag-finalize sa gikahinamang rematch nila ni Nonito ”The Filipino Flash” Donaire ug Australian Vic “Raging Bull” Darchinyan gumikan sa international TV rights.
Mao kini ang gipadayag ni boxing promoter Gary Shaw sa interbyu sa Viva Sports.
“I don’t like and I’m not happy with the deal on the international TV rights and I’m hoping that they (Top Rank) will come back with a better offer so we could make the fight,” matod pa ni Shaw.
Si Shaw, kinsa maoy promoter ni Darchinyan, nagkanayon nga kon magmagahi ang Top Rank, nga maoy promoter karon ni Donaire, hayan mangita na lang siya og kontra alang sa iyang boksidor.
Nagkanayon si Shaw nga wala siya nakauyon nga gustong solohon sa Top Rank ang tanang kita sa TV rights sa Pilipinas.
Matod ni Shaw nga mirason ang Top Rank nga dili ra kaayo tantong dako ang makita sa TV rights sa Pilipinas.
Apan alang kang Shaw, dili siya motuo niini hilabi na kay ilado na sab gyud kaayo si Donaire sa Pilipinas.
Sa iyang bahin, si Donaire nagkanayon nga wala gyud siya’y kasayuran ning tanan.