Ulo sa anak nabungkag; amahan naputla’g kamot

Wednesday, September 1, 2010

NABUNGKAG ang ulo sa usa ka lalakeng kaslunon karong buwana samtang naputol ang tuong kamot sa iyang amahan human mabuthi sa ilang gilabay nga dinamita niadtong Lunes sa buntag sa kadagatan sa Brgy. Tomingjao, lungsod sa Daanbantayan, Sugbo.

Si Dexter Yaun, 22, ulitawo, taga Sitio Capandanan, Brgy. Tomingjao, mamanagat, namatay diha-diha human mabungkag ang walang bahin sa ulo, ingon man nakaangkog mga samad sa nagkadaiyang bahin sa lawas human maigo sa dinamita.

Have something to report? Tell us in text, photos or videos.

Updates on President Benigno Aquino III's presidency

Ang amahan nga si Nicasio, 46, mag-uuma, ingon man construction worker, naputlan sa tuong kamot human maguhay-guhay sa pagkaigo sa dinamita.

Nangasamad usab ang ubang parte sa lawas sa duha nga agi sa botelyang nangabuak.

Dali silang gidala sa tambalanan sa Daanbantayan apan gibalhin sa tambalanan sa dakbayan sa Sugbo tungod sa grabing kahimtang.

Si PO3 Mamerto Gastador, imbestigador sa kapulisan sa lungsod sa Daanbantayan nga nahinabi sa Sun.Star Superbalita, nagkanayon nga ang mga kabanay sa mga biktima nibutyag nga niadtong Dominggo sa gabii si Dexter ug ang iyang amahan nagkasabot nga mangilaw sa dagat Lunes sa buntag.

Apan nisugyot si Dexter sa iyang amahan nga mopalit silag “dinamita” sa ilang silingan nga maniruhay aron ilang itiro sa pagpanguhag isda nga ilang kilawon sanglit dunay bisita nga mopaapas uban usab sa ilang mga kabanay sa baybayon sa samang buntag.

Matod pa ni PO3 Gastador nga mga 300 metros gikan sa baybayon ang biktima ug ang amahan niini nag-usa sa pagsakay sa usa ka ka gamay nga sakayan dala ang usa ka botelyang dinamita.

Si Nicasio nga nakakita sa duot sa mga isda daling nidagkot sa pabilo sa “dinamita” aron itiro sa isda ngadto sa dagat.

Apan naratol kini ug ang dinamita didto masangit sa walang tingkoy ni Dexter inay sa dagat hinungdan nga didto mobuto.

Tungod sa kakusog sa buto sa maong dinamita, nabungkag ang ulo ni Dexter sa walang bahin.

Si Nicasio naputlan usab sa iyang tuong kamot.

Dugang pa niini nga kon maniruhay pa unta kadtong amahan makahibalo unta kadto kon unsay klasing pabilo nga gigamit sa maong dinamita hinungdan nga paglabay sa atubangan wa makabantay sa pagsirit sa pabilo nasangit na hinuon sa tingkoy ug nibuto.

Ang mga kabanay sa mga biktima kinsa nakadungog sa sipa kaayong buto daling niadto sa lugar ug mao na lay ilang naabtan nga patay na si Dexter samtang amahan gidala sa tambalanan tungod kay grabi sa iyang naangkong kadaot sa lawas, nawong ug pagkaputol sa kamot.

“Kining biktima ug iyahang amahan dili gyud ni sila maniruhay kay dagkong nukos mao ang kuhaon niini sa pagpanagat. Ang amahan kinsa maoy nitero mag-uuma sab ug nagtrabaho sa construction dinhi sa dakbayan. Ratol gyud to siya pag-ulbo sa pabilo,” sumala ni PO3 Gastador.

Siya nibutyag nga sa pagkakaron ang ilang gihimong lakang ang pag-ila sa tawo nga gipalitan og dinamita sa amahan ug anak aron ilang mapasakaag tukmang kaso.

Siya nagpuyo usab sa nahisgutang barangay ingon man man kapitan usab ang iyang amahan nga si Romulo nga hugot gyud nga nipatuman sa pagdili sa maong matang sa illegal nga panagat.

Gipadayag ni Gastador nga daw siya lay gibantayan sa mga illegal nga mangingisda sa lugar gumikan kay dihang ni-duty siya duna gilayoy naniro.