PATAY na nga niabot sa tambalanan ang usa ka truckboy nga nahug sa trak nga iyang gisakyan ug naligsan pa gyud human masangit sa sanga sa kahoy sa Sitio Baha-baha, Barangay Liburon, Carcar, Sugbo niadtong Biyernes sa gabii.

Ang biktima giila sa kapulisan nga si Michael Lastimosa, 20, taga barangay Uling, Naga City, trabahante sa pabrika sa noodles, nga iya ni Felix Cabusas.

Si Lastimosa ug ang kauban niini nga si Mark Anthony dela Cerna diha sa luyo sa 6-wheeler cargo truck (plate number GMV-838) nga gimaneho ni Regie Labajo, taga barangay Lagtang, siyudad sa Talisay.

For updates from around the country, follow Sun.Star on Twitter

Ang cargo truck puno sa kargang mga sugnod nga kahoy alang sa pagbuhat og noodles.

Gibabanang pasado alas onse sa miaging gabii nahitabo ang aksidente apan sayo na sa buntag kagahapon nakadawat og alarma ang kapulisan gikan sa mga lumolupyo sa nahisgutang dapit.

Ang mga residente sa barangay natingala dihang ilang nakaplagan sa dan ang nagkatag nga dugo, nahabiling bahin sa bagolbagol ug utok mao nga ila dayong gipahibawo ang kapulisan.

Wa hinuon mo-report sa kapulisan ang drayber nga si Labajo ug tag-iya sa sakyanan nga si Cabusas kabahin sa nahitabo.

Sa pasiunang imbestigasyon sa kapulisan sa Carcar city nga gipangulohan ni SPO3 Jonas Pananganan, samtang nagdagan ang cargo truck, nasangit sa sanga sa kamansi nga nagsiwil sa dan si Lastimosa hinungdan nga nahulog sa yuta.

Ang iyang ulo nalatayan sa panguwahiang tuong ligid mao nga nabuak.

Human sa aksidente, gidala siya nila ni Labajo ug Cabusas sa Vicente Sotto Memorial Center apan gideklarar na kining patay sa pag-abot sa tambalanan.

Si PO1 Gilmer Noval sa Carcar Police nga nahinabi sa Sun.Star Superbalita nagkanayon nga ngiob ang maong karsada mao nga wa makabantay ang biktima sa mga sanga kilid sa karsada.

Sa pagkakaron padayon pang giimbestigar sa kapulisan sa Carcar ang panghitabo samtang ang drayber ila pa usab nga gipangita. (Dugang taho ni Jurdelyn C. Repaso-USJR Masscom Intern)