MIKOMPIRMAR si Gandy “Yang-Yang” Valle sa iyang partisipasyon aron depensaan ang iyang korona sa 2009 Sun.Star Superbalita 9-Ball Challenge nga ipahigayon karong Nobiyembre 7-15 sa Elizabeth Mall Activity Center.

Ning higayuna, daku-dako gyud ang purohan ni Valle nga mahimong labing unang back-to-back champion sa torneyo tungod kay di man makaapil ang kadaghanan sa mga dekalidad nga mga bilyarista sa nasod di sama sa miaging tuig.

Sun.Star accepts donations for victims of Typhoon Ondoy

Gipasabot ni Christian Rodriguez, usa sa mga gipiyalan sa pagpadagan sa torneyo, nga kadaghanan sa mga banggiitang Pinoyng mga bilyarista adunay eskedyul sa gawas sa nasod.

“Ang uban manuwa sa Japan Open, ang uban sa Qatar. Na-conflict man gud ni ang atong schedule karon sa ubang major tournaments sa gawas,” pasabot ni Rodriguez.

Gawas kang Valle, ang laing mga ilado nga kompirmadong mosalmot mao sila si kanhi double world champion Ronnie Alcano, Roberto “Superman” Gomez, ug ang nagkakuyaw nga si World no. 9 Lapulapu City-based Demosthenes “Plong Plong” Pulpul.

Apan bisa’g di kaayo daghang mga ilado ang nangapil, gituohang lisod gyud gihapon ang kompetisyon kay mangapil man ang mga sumosulbong sa mga tirador sa Sugbo hasta sa ubang mga dapit sa nasod.

Gawas kang Valle, ang ubang nangaging kampiyon sa torneyo mao sila si Antonio “Gaga” Gabica (2002), Dennis Orcollo (2003 ug 2006), Elmer Haya (2004), Alcano (2005), ug Alex Pagulayan (2007).