Vallena: Unsaon pagpili og unang bike (2)

Saturday, September 4, 2010

Roger Vallena
Pedal

NIADTONG miaging Dominggo akong gihisgutan ang pagpili og unang biseklita. Nakahisgot ko og frame size sa biseklita kay sama sa mga senina, naa sab niy mga sukod tukma sa imong bayhon.

Have something to report? Tell us in text, photos or videos.

Nangita gyud kog oras aron makabisita ko sa akong amigo nga technician nga si Ronald sa Aison Bikeshop sa Banilad, Mandaue city aron makapangutana ko sa tukmang frame size base sa height sa usa ka tawo.

Frame size

Sama nako nga 5’4”, ingon niya 15 inches nga frame size ang haom nako. Mao diay nga ang akong napalit nga karaan nga 2002 Specialized bike frame medyo dako ra nako kay 16 inches man ang size. Sa 5’55” nga gitas-on, mao sab gihapon ang haom nga frame size.

Updates on President Benigno Aquino III's presidency

Niadtong 5’6” mahimo ra sab ang sama nga frame size apan sa mga 5’7” ngadto sa 5’8”, ingon ni Ronald mas haom ang 17 inches kay pangitaon na kuno ang akoang frame nga 16” ning panahuna. Kadto diayng medyo mas mubo nako, nag-recommend siya og 14 inches nga frame.

Ang akong higala nga si Philip Camil Gomez nga nagtrabaho sa usa ka call center sa may IT Park, mipalit og Marin nga mountainbike (MTB) nga 19” ang size. Matod niya komportable na siya sa mao nga gidak-on sa frame.

Unsa nga frame?

Niadtong mangitag frame, sama sama diha sa www.cebucycling.com, pangutan-on dayon sa mga suheto og unsa nga discipline sa mountainbiking ang iyang sudlan o ganahan. Kay sama nako sa una, nagtuo ko nga pareho ra nang tanang mountainbikes. Nasayop diay ko kay naa sab diay nay klase.

Ang mga common kaayo mao ang cross-country, downhill ug freeride bikes. Kasagaran gyud hinuon nga makit-an diha sa mga karsada mao ang pang cross-country, diin sagad ang suspension naa lang sa atubangan, pinaagi sa fork niini. Ang akong biseklita pang cross-country ug naggamit ko og XCR Suntour nga 100mm ang travel. Akong giilisan ang akoang RST Omega nga 120mm ang travel kay medyo taas ra alang nako.

Ang frame sa downhill mas dagko ug mas lawom ang travel sa iyang fork. Naa sab ni suspension sagad sa likod aron mas komportable, di tay-og kaayo ang lawas sa siklista.

Ang mga rider sab niini nga discipline magsul-ob og full-face motocross helmets ug mga body armor kay kuyaw ni nga mountainbiking. Kon makasugat kag mga magbiseklita nga ingon ining akong gihulagway, chances are downhill riders na sila.

Mas lapad sab ang size sa ilang mga ligid ug dunay uban mas dako pa gani kay sa ordinaryong motorsiklo. Gituyo ni aron mas moaguwanta ug mas stable sa paspas nga dinulhogay, labina sa mga lumba.

Ang freeride nga bike di kaayo layo sa downhill. Ang ilang mga kalainan naa sa geometry. Apan di na lang nako ni hisgutan og maayo kay wa na koy igong space. Ang importante, akong nahisgutan ang budget, frame size ug matang sa frame sa imong unang bike.

(tinubdan:www.wikipedia.com,www.coolbiking.com)