MAGHUWAT na lang kang Bise-Mayor Michael Rama ang grupo sa mga manindahay nga sakop sa Cebu Market Vendors Development Cooperation (Cemvedco) una pa sila mohimo og lakang sa pagtukod og balik sa ilang stalls sa may MC Briones st.

Si Rama toa karon sa United Arab Emirates nagtambong sa Urban Waterfronts Regional Conference.

Si Erwin Gok-ong, tsirman sa Cemvedco nga nahinabi sa Sun.Star Superbalita, niingon nga mao kini ang nauyonan sa ilang grupo sa ilang tigom kagahapon.

Gani iya lang unang gipapauli ang mga panday nga ilang gikuha gikan sa habagatang Sugbo kay nagpakaon man sila niini kada adlaw.

Mao sab kini ang gimando sa miaging adlaw ni Acting Mayor Hilario Davide III human makigsulti kang City Administrator Francisco Fernandez.

Si Fernandez nakigtagbo kanila ni Gok-ong ug Sto. Niño brgy. captain Pancho Ramirez Sr.

Si Gok-ong niingon nga ang pagtukod nila sa mga stall duna nay pagtugot gikan kang Mayor on-leave Tomas Osmeña.

Nipasabot si Gok-ong nga ang tanang mga rekisito ug kondisyon sa pagbalik nilag butang sa stalls ilang gituman.

“Kanang agianan sa mga establishment nga giingong nangreklamo, gikan sa tulo, among gihimong pito. Amo pang gipadak-an ngadto sa 3.5 meters ang agianan aron makasud na ang mga Elf (sakyanan),” nagkanayon si Gok-ong.

Gawas pa niini, ilang pamub-an ang ilang modular stalls aron di na masalipdan paang mga establisemento.

Sa hangyo sa City Traffic Operations Management (Citom) nga mohatag og 13 metros nga hawan sa karsada, gihimo gani nila kining 14 metros.

Gawas niini, ila pang giatiman ang kahimtang sa kahusay ug kalinaw sa mao nga dapit, agig tabang sa brgy. Sto. Niño.

“Unsa pa may ilang gipangita nga gituman na man namo ang tanan?Naglibog gyud mi unsa pay ilang tuyo,?” nidugang si Gok-ong.

Iya sab nga gihangyo ang Cebu City Hall nga ikonsiderar ang kahimtang sa 42 ka mga manindahay ingon man sa lain pang grupo sa vendors nga nanginabuhi sa mao nga dapit.

“Gawas ining 42, naa pay laing nanginabuhi nga nagutman sab. Daghan intawon ang nagsalig anang lugara diha,” pasabot ni Gok-ong.

Kalabot sa giingong illegal structure, nangutana siya kon sila ra bay ingon niana dinhi sa Sugbo.

Matod niya nga kon tan-awon ni Squatters Prevention and Encroachment Elimination Division (Speed) chief Vicente Mercado ang tibuok siyudad, daghan kaayo ang illegal structures.

Siya niingon nga di sa tanang dapit mahimong hugot nga ipatuman ang balaod kay daghan kaayong mga kabos ang maapektuhan.

“The law shall be tempered with mercy,” matod niya.

Niadtong Sabado, sila si Gok-ong ug Pancho nagkalalis tungod sa pagtukod og balik sa 42 ka vendors sa ilang stalls.

Supak si Pancho nga magtukod og balik ang vendors bisan kon ang Siyudad nisaad na nga mahimong makabalik pagtukod sa stalls ang grupo ni Gok-ong kon mahuman na ang drainage system pagtrabaho.

Gawas pa niini, si Gok-ong nibutyag nga nikita ang Sto. Niño gikan sa mga vendors sa dapit og labing minos P120,000 ang matag tuig kay nagbayad sila og tag P10 kada adlaw. (REV)