PADAYON pa ang pagpakigsabotsabot ni Senador Manny Villar sa posibleng local nga mga kandidato nga suportahan sa Nacionalista party.

Apan sa gihapon, ang standard bearer sa partido alang sa 2010 elections nitataw nga sa iyang pagbisita dinhi sa Sugbo sa miaging adlaw ug kagahapon, nakigsulti siya sa pipila ka mga pulitiko sa Sugbo.

Wa hinuon niya gibutyag kon kinsa kini, apan si Lahug Barangay Captain Mary Ann de los Santos nikompirmar nga nagtagbo sila ni Villar, apan wa siya mosulti.

Sun.Star accepts donations for victims of Typhoon Ondoy

Gusto niyang magtagnatagna si Cebu City Mayor Tomas Osmeña kon unsa ang ilang gihisgutan.

Nangutana siya kon ang mayor nangespeya na ba dihang gitug-anan nga si Osmeña ang nisulti sa mga reporter sa giingong panagtagbo nila ni Villar.

“Nang-espeya na siya sa iyang kontra sa pulitika? Alegre. He’s funny. Maayo kay nakahibalo siya. But I will keep him guessing (on what we talked about),” matod niya sa Sun.Star sa sa telephone interview.

Sa iyang pagpaniudto uban sa mga sakop sa media sa Sugbo kagahapon, niingon si Villar nga bisan ang lokal nga mga pulitiko wa pa gyud makahukom kon modagan ba o unsay daganan ingon man asa sila sandig nga nasudnong partido.

“Kaya nga nandito ako para makipag-usab,” matod ni Villar, kinsa lihay kaayo sa pagsulti kinsa ang iyang gikatagbo.

Usa sa gihugonhugon nga kandidato pagka gobernador ni Villar mao si Bise-Gobernador Gregorio Sanchez, kinsa nibiya sa One Cebu party ni Gobernador Gwen Garcia.

Si Sanchez mismo niangkon nga nagduha-duha pa siya sa paghukom kon modagan ba siya kay mas pabor siya nga mogugol sa panahon sa iyang negusyo.

Kagahapon, si de los Santos padayong nangbisita og mga barangay uban kang Guardo alang sa ilang advocacy nga new politics sa ilang “Our Cebu City” campaign.

Gikataho nga laing gidapit og tigom ni Villar mao sila si Gobernador Gwen Garcia ug manghod niining si 3rd district Rep. Pablo John Garcia.

Apan ang kongresista nanghimakak niini kay didto ra siya sa probinsya hangtod kagahapon.

“No, that’s not true. I was in Toledo City the entire morning and then at Pinamungajan until midnight,” matod ni Pablo John sa Sun.Star Cebu sa phone interview kagabii.

Hinuon, si Capitol consultant Rory John Sepulveda niingon nga way dautan kon ang gobernador gidapit ni Villar.

“Na-S siya kay wa siya imbetaha? Kaluoy pud),” matod ni Sepulveda kang Osmeña kinsa giingong nitug-an kalabot sa meeting.

Wa hinuon mokompirmar si Sepulveda kon duna bay meeting, apan iyang giangkon nga dunay imbetasyon si Villar. (JFT/REV/RHM sa sa Sun.Star Cebu)