WA na makatambong sa husay ang usa ka akusado sa kasong illegal drugs human siya gibanhigan samtang nagpaingon sa Hall of Justice sa dakbayan sa Lapu-Lapu kagahapon sa buntag.

Namatay diha-diha ang biktima nga naila nga si Archie Bahio pinaagi sa iyang driver’s license, 35, taga barangay Mactan, dakbayan sa Lapu-Lapu sa dihang gipusil sa makadaghang mga higayon.

Sun.Star accepts donations for victims of Typhoon Ondoy

Si P/Insp. Juan Capacio sa Crime Against Persons Desk sa Lapu-Lapu City Police Office nibutyag nga samtang luwan si Bahio sa iyang motorsiklo aron sa pagtambong sa gikatakda nga husay sa kaso sa dihang gipusil sa tulo ka wa mailhing mga mamumuno nga luwan sa laing motorsiklo.

Matod pa ni Capacio sa dihang nahinabi sa Sun.Star Superbalita nga sa mga alas 10:30 kagahapon sa buntag igo nga niabot ang biktima duol sa Bank of Commerce sa M.L. Quezon avenue sa barangay Pusok dihang siya gipusil.

Nakaangkon og upat ka mga samad pinusilan ang biktima diha sa luyo nga bahin sa iyang lawas.

Ang kapulisan nakahipos og mga ebidensya nga naglakip sa lima ka mga basiyo sa bala sa .45 kalibre nga armas ingon man ang natumba nga motorsiklo ni Bahio nga Honda XR nga nagdala sa plate number GR-6602.

Dugang pa ni Capacio nga padayon pa ang ilang follow-up operation aron sa pag-ila sa mga mamumuno ingon man ang pagsuta sa motibo sa pagpamusil. (FVQ)