WA pay kasigurohan kon aprObahan ba sa siyudad sa Sugbo ang napiliang dapit sa mga mini bus operator nga himuon nilang temporaryong terminal.

Hinuon sigurado na gyud ang pag-uyon sa syudad nga mobalhin og laing terminal ang mga mini-bus tungod kay duna namay giaprobahang ordinansa nga mag-ban na kanilang makasud sa eskina N. Bacalso ug Panganiban.

Matod ni Konsehal Sylvan Jakosalem, chairman sa committee on transportation, nga gisusi ug gitun-an pa karon sa Cebu City Traffic Operation Management (Citom) ang dapit pagtino kon sobra na kini sa 300 meter radius nga distansya gikan sa Cebu South Bus Terminal.

Sun.Star accepts donations for victims of Typhoon Ondoy

Ang Cebu South Mini Bus Operators Association (CSMBOA) ubos sa pamunoan ni Julie Flores nihangyo kang Mayor Tomas Osmena nga ang terminal sa Cebu Auto Bus nga naa sa eskina N. Bacalso ug V. Rama avenue maoy himuon nilang terminal.

Matod ni Jakosalem nga wa pay lagda ang syudad alang sa terminal sa mga mini bus apan siya nagtuo nga kinahanglan gyud nga di kini duol sa existing terminal.

Gawas niini, gusto sang tan-awon sa Citom kon di ba makahuot sa trapiko sa dapit kon anha na ang terminal sa mga mini bus.

Sa suwat ni Flores, ilang gipasabot nga kon itugot ang pagpagamit sa ilang proposed terminal, ang habig sa V. Rama maoy himuon nilang entrance maong kinahanglan rang mo-left turn gikan sa N. Bacalso ang mga mini bus gikan sa south samtang ang N. Bacalso maoy ilang exit maong gikan sa terminal mo-right turn lang sila diretso na sa ilang biyahe.

Gipaabot nalang nga hingpit nga mapatuman ang ordinansa sanglit gikan sa pag-aprobar niini sa konseho duha ka semana ang nakalabay, duna pa man kini 15 ka adlaw una hingpit maepektibo.

Kon di man itugot ang terminal sa Auto Bus, matod ni Jakosalem nga posibleng sa Citilink o sa may habig sa SRP nalang una ang temporaryong terminal sa mga mini bus ug motanyag nalang og shuttle service ang siyudad alang sa mga pasahero paingon sa downtown area. (CPL)