Warning ni Digal

Tuesday, September 7, 2010

KAPULISAN sa lalawigan sa Sugbo gi-warningan sa ilang labaw nga di gyud moapil sa pagpalusot sa mga paltik nga armas.

Kini maoy bahad ni Sr. Supt. Erson Digal, director sa kapulisan sa lalawigan sa Sugbo, human ang usa niya ka sakop gipasanginlang maoy tag-iya sa turnuhan sa paggama og paltik nga armas.

Have something to report? Tell us in text, photos or videos.

Updates on President Benigno Aquino III's presidency

Si Digal niingon nga gikinahanglan nga di nila gamiton ang ilang uniporme alang sa ilang pagpagmaligyag armas.

“Bantay lang mo, madakpan mo sa grupo sa Cebu Provincial Police Office (CPPO) ako gyud nga ipa-dismiss sa trabaho,”sumala pa ni Digal.

Gawas niini giawhag ni Digal ang mga lumolupyo sa probinsya sa Sugbo nga mo-report direkta kaniya kon dunay mga pulis nga nagpaluyo niining pagpamaligya ug paghimog paltik nga armas.

Gipahibawo niya nga ilang gihingusgan ang pagpanakop sa loose firearm.

Subay niini, gipahibawo ni Digal nga wa pa ma-clear sa imbestigasyon si PO1 Celito Suerte, sakop sa Tudela Police Station kinsa maoy gipasanginlang tag-iya sa turnuhan sa paggama og paltik nga armas.

Matod pa ni Digal nga gimanduan niya si Sr. Insp. Ruben Cuizon, hepe sa Provincial Investigation and Detection Management Branch (PIDMB), pagpadayon sa imbestigasyon batok kang Suerte.

Si Suerte gipasanginlan ni Dindo Pitogo, ang nadakpan sa CIDG-7 nga dunay kahimanan sa paggama sa palktik nga armas nga gipanag-iya ni Suerte ang turnohan.Si Suerte una nang nihimakak sa pasangil. (DRT)