Women’s group gipamulitika?

Sunday, March 21, 2010

NUNOT sa nagkaduol na ang eleksyon, nitumaw karon nga duha ang grupo sa kababayen-an sa dakbayan sa Talisay.

Ang maong mga grupo pulos identified sa mga pulitiko sa dakbayan sa Talisay, ang Talisay City Women’s Federation (TCWF) nga gitukod ni Konsehal Shirley Belleza niadtong 2001 ug ang bag-ong grupo nga giingong iya ni Bise Mayor Alan Bucao.

Have something to report? Tell us in text, photos or videos.

Si Josephine Leuterio, presidente sa TCWF nga nahinabi sa Sun.Star Superbalita nagduda nga ang bag-ong grupo nga gitukod gamiton lang sa pamulitika.

Click here for Election 2010 updates

Matod ni Leuterio nga nahitabo na niadtong 2001 nga nagtukod og grupo sa kababayen-an ang asawa ni Bucao nga si Marieta ug kini gitawag og Federation of Barangay Women’s Association (FBWA).

“Basin kolurom nang grupoha. Kadtong grupo bitaw nila sauna nakadawat og financial assistance ni Congressman Gullas (Eduardo) unya nagtukod sila og canteen sa slaughterhouse pero asa naman na ron? Hai na man tong ilang kuwarta?” matod ni Leuterio.

Si Bucao sa iyang text message nipasabot ,di siya ang nagtukod sa bag-ong grupo karon sa kababayen-an kon di ang mga kapitan.

Giangkon ni Bucao nga nitabang siya sa mga gikinahanglan sa mga kapitan aron matukod ang bag-ong grupo.

Nasubo ang bise mayor sa kahimtang karon sa grupo sa kababayen-an sa Talisay nga gihulagway niyang “highly politicized” na.

Samtang si City Administrator Richel Bacaltos nitug-an sa Sun.Star Superbalita nga nalipay siya sa gibuhat sa mga kapitan nga pagtukod og bag-ong grupo sa kababayen-an.

Matod ni Bacaltos nga isip campaign manager sa Alayon, dako kini nga kalambuan alang sa ilang grupo.

Si Konsehal Shirley Belleza nitug-an sa Sun.Star Superbalita nga gisugdan niya pagtukod ang grupo sa kababayen-an niadtong November 2001 ug iyang gisuroy ang tanang barangay aron pagporma niini.

Nakompleto ang grupo sa buwan sa Pebrero sa 2002 apan dihang gisaulog ang Women’s month sa Marso, wa na siyay apil tungod kay ang asawa naman ni Bucao ang nagdala niini.

Dihang nahimong chairman sa committee on women sa konseho niadtong 2007, gihiusa ni Belleza ang tanang grupo sa kababayen-an ug giparehistro sa Department of Labor and Employment (DOLE)-7 ug nakadawat na sila og grant.

Si Aida Zabate, treasurer sa TCWF nitug-an sa Sun.Star Superbalita nga minilyon karon ang pundo sa ilang grupo.