Dear Atty. Joan,
Ako si Lilia, inahan ni Tonet nga nahimong biktima sa Child Trafficking. Bisan adtong wala pa nagdagan ang kaso, kanunay mangayo og pasaylo si Abner, ang akusado, ug moingon nga wala siya’y tinguha nga pahimuslan si Tonet ug andam siya nga minyoan hilabi na nga anaa na si Tonet sa saktong pangedaron. Ang abogado ni Abner niingon nga kinahanglang mopirma si Tonet og affidavit of desistance aron ma-dismiss ang kaso ug madayon ang kasal. Sakto ba kini, Atty?
Lilia
Dear Lilia,
Dili kana mao. Matud sa Section 11 sa RA 10364 o ang “Expanded Anti-Trafficking in Persons Act of 2012″, ang mga kaso kabahin sa trafficking in persons, sama sa child trafficking, dili mahimong ma-dismiss agi lamang sa usa ka affidavit of desistance nga pirmado sa biktima o sa iyang ginikanan o sa iyang legal guardian.
Pareho nga gimando-an sa balaod ang public ug private prosecutors nga mo-batok ug mopadayag sa ilang pagsupak sa bisan unsa nga musyon o aksyon nga tinguhang pag-dismiss sa kaso.
Kon aduna pa kamoy mga pangutana nga adunay kalabutan sa katungod sa mga bata o aduna kamoy namatikdan nga gidili nga binuhatan o matang sa pang-abuso ngadto sa mga bata, mahimo kamong mo-contact sa among hotline 0908-896-0355.
Hinumdomi nga kini opinyon lamang nga nag-base sa inyong gipadala nga lakbit-saysay ug kini pwede nga mausab kon dugang pa nga mapatin-awan ang mga detalye kon personal nga mahinabi ka sa abogado.
Atty. Joan
Gikan sa Children's Legal Bureau