Suyu king Tau o Suyu king Apung Ginu?
(Service to Man or Service to God?)
“Nung mabyasa tamung luguran ing Kakataskatasang Panginwan,
kanita maging asna kasaguli at agnan-agnan luguran ding aliwang mabibye lelangan.
Mengari iting tutugtug danum king uyat ning impun tanaman
o magkalub pamangan king dungus ninu man.”
~Srila AC Bhaktivedanta Swami Prabhupad, Ing Yumu ning Pamitagulaling, Panaganu
“Nung makananung ing ninu man a mandilig king uyat ning impun tanaman pakabsyan ne ing impun, ding sanga at tangke at anti mu irn kapamilatan ning pamagdaun pamangan sisesen na la bye ring kasangkapan ding panamdam, inya anti mu naman ding balang metung at sabla mipupuryan nung ing ninu man sasamba king Magdili-diling Alang-Kamalyan.”
~Nwan a Pamanyuyu, Dalit 4: Dangka 31: Sunis 14-15
(Srimad Bhagavatam, Canto 4: Chapter31: Verses 14-15)
***
Likas kekatamu ngan ing sumuyu. Gunyat. Gusal. Miyayaliwa mu naman ing sangkan tamu. Bang manakitan, mangan, mibantug, mitas a tungkulan, buri tamu mu, buri ning o ring pakamalan dapot ing pekamaulaga uling buri na’t ikakatula ning Apung Ginu.
Ating tutuki karing mibansagang banal a pamaglakbe a nung nu ring tau paygastus la at titipun e biru kadakal a salapi, maglakbe lang asna karayu o paypagal lang asna kalambat at asna kasakit. Jorna, Nazareth, Jerusalem, Medina, Mecca, Vrindavan, Himalayas at aliwa pa ba’ra mung apatunayan ing pamanyuyung makatagulaling king Kakataskatasang Panginwan. E pa makayabe kareta ing panganib.
Ding makiagyu o mabandi magluste lang kata-kata king pamipagawang pipagaralan, pulwan o pati na pisamban ba’lang makasuyu karing para dang tau lakwas na karing pakakalulu. Mapagkawang-gawa ngara pin deng sasabi. Kapagnasan da reti ing dakal la asopan at ita metung nang arle ning lugud o suyung makatagulaling.
Atin mu namang magaral la king pamaglumpung o pamakilaban anting kawal ning kapamalan ning bangsa ba’lang makasuyu king Indung Balen. Deti e la tatakut kanung mate king pamanyuyu da at ilang maging bayaning mayayaus.
Aliwa la pa mu naman ding magaral bang makapag-pari, madre o pastor. Ila deti ring bala mu wari pekamalapit a pamanyuyu king Apung Ginu uling ila ring ati lu king pisamban at gagampan king pamanyamba at pamidake karing amanu at aral ning Apung Ginu karing aliwa o sablang sasalpantaya.
Makanyan man, saguli mu at mayan ing pamanyuyu king Apung Ginu at Ya ing sasabi kanita kapamilatan ding Banal a Kasulatan. Agyang ninu malyaring sumuyu king Apung Ginu ?nanu man ing kabilyan tamu king bye. Mabandi ka o maluka. Babai ka o lalaki pati na libutad da reta. Mura ka twa o matwa na ka. Masikan ka o mayna. Salunan o malusug. Alang pasubali ing pamanyuyu.
Ing maulaga ya pin ing sumuyu king Apung Ginu bayu o kesa karing aliwang lelangan. Nung suywan ya ing tau o aliwang mabibye, e na buring sabyan nita susuywan mu neng tambing ing Apung Ginu agya mang katulan na ing sumuyu tamu karing para tamu. Aliwa pa mu rin itang Ya mismu ing kekatamung suywan. Ganakan ta Ya mu parati o agyang mapilan mung penandit king patingapun at parangalan ta Ya kapamilatan ding dapat tamung makatagulaling para Kaya.
E tamu kaylangan pang magdaun gintu o dakal a salapi Kaya bang apatula tamu Ya. King Dalit ning Kakataskatasang Panginwan, 9:26, ngana ning Ginu: “Ninu mang miyampang Kanakung ating lugud at tagulaling?bulung, bulaklak, bunga o danum, tanggapan Ke ya.”
Dake Talabaldugan:
1. kapas – (palagyu) asan a madwi. Penibatan ning lagyu ning Balen Kapas o Capas king Tarlak. English – A very spiny kind of fish. Alimbawa king pamangamit: “Alang bisang mangan keng asali nang kapas ning dara mi neng asne karakal a dwi.”
2. kapatád – (palagyu) kaputul, ding pengari na, pengari mu o yu la naman. Kaka, koya, atsi. English – sibling, brother or sister. Alimbawa king pamangamit: “Agyang kapatad neng lasyu i Bisen, marayu la pamiyawig.”
3. kapatagan – (palagyu) dake ning labwad o gabun nung nukarin alang bunduk. English – plain area or part of land; usually preferred by people for in building their shelters. Alimbawa king pamangamit: “Mengasdan ya ing bingut a mibait keng kabundukan inyang akit na ing kapatagan.”
4. kapate – (palagyu) kalaban, kasalang, kalumpung. English – enemy, foe, adversary. Alimbawa king pamangamit: “Mayap ing gagalang la ngan ding sabla pati na reng kapate.”
5. kapayapan – (palagyu) kabilyang payapa o mapayapa, taimik, karatunan, kelang kagulwan. English – peace. Alimbawa king pamangamit: “Balang memalen alang bisang kaligaligan at alingasngas?pane mung kapayapan ing karelang pagnasan.”
***
PAMANGAPAMPANGAN: Ating kasebyan a mangabaldugang “suplada” o “pasumpung-sumpung kasungitan at awsan da lang—“malangi paritan. Nung malangi ya pin naman ing paritan e ya sindi uling ala yang laru o gas. Keng dapat ning tau, buri nang sabyan detang nung pakisabyan mu la o atwan mu la ing iyablas da kasungitan. Atin lang toyu o topak ngara pin deng aliwa. Atin atang antita taganang tau lakwas na kareng dalagang matwa o matwang baintau. Balamu masosora la parati keng bye ra. Alimbawa: “Alang bisang makiyutus kang Biring uling parati n’ya mung makasimangut at malangi paritan.”
***
Agkatan da kang mambag o midake nanu mang Kapampangan a kawatasan, sanese, sisti, kasuryan, iriya anting bayung dagdag o nanu mang dikil king Kapampangan. Nanu mang kutang o sisti king misulat king Kapisik, malyaring ikutang o malinawan king talasulat. Pakiparala king `////email address, garciakragi@yahoo.com o iyaus o i-text king +639988948624 o +639423924399. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me, abe!
--END-----