SUKAD sa kasaysayan, karon pa nahitabo nga nagkayagaw ang kongreso nga wala pa makapili kon kinsa ang mamahimong House Speaker sa 18th Congress, daghan ang interesado apan, silang tanan nag-agad gihapon sa atong presidente kung kinsa gyud ang iyang gusto.
Matud pa sa tigpamaba sa Malakanyang nga si Salvador Panelo, sugyot daw sa atong presidente Rodrigo Duterte mao ang TERM SHARING, ug kini nagtumbok ngadto kang Taguig Congressman Allan Peter Cayetano, ug Marinduque Congressman Lord Velasco.
Gawas nga dili musogot ang duha, misamot na, hinuon sa dihang misalga na ang atong Mayor sa Davao City, Sara Duterte-Carpio, nga dili musogot sa term sharing, diin nakig-coalition na hinuon ang iyang partido nga Hugpong sa Tawong Lungsod ug Partido Demokratikong Pilipino (PDP-LABAN).
Ang orihinal nga nag-ambisyon nga mahimong speaker, upat sila. Una, si Lord Velasco, Allan Peter Cayetano, Martin Romualdez ug ang gipalagpot na nga speaker, Pantaleon Alvarez sa first district sa Davao del Norte.
Karon nga misulod na ang atong mayor sa Davao City, misamot na kadaghan, anaa ang atong Congressman sa 1st district nga si Paolo “Pulong” Duterte, 3rd district Congressman Isidro Ungab, ug apil na ang atong Congresswoman sa 1st district sa Davao Oriental nga si Corazon Malanyaon, kinsa kaha kanila?
Usa lang ka tingog ang angay matuman dinhi, kinahanglan ang presidente maoy mopili kung kinsay iyang gusto nga mahimong speaker ning nahabilin nga tulo ka tuig sa iyang termino aron walay mahimong babag sa iyang legislative agenda ug matuman ang tanan niyang gusto sa kalamboan sa Pilipinas hangtud sa tuig 2022.
Ang problema lang, kay ma-ikogon ang atong presidente tungod kay pulos niya tawo ang tanang nangambisyon sa pagka-speaker, mao nga gipasulod niya si Mayor Sara ang iyang pinangga ug sinaligang anak, basta si Mayor Sara raba ang modiskarte, matuman gyud.
Atong kahinumdoman nga si Mayor Sara ang misulod sa kongreso aron palagputon si Alvarez diin natuman ang tanan di ba?
Karon gusto niya nga si Congressman Isidro Ungab ang sunod nga speaker sa 18th Congress, sa atong pagtuo murag duol-duol kini sa tinuod.
Nganong giilogan man gyud kining pagka-speaker? Simpol lang ang tubag, amigohon mo lang ang super majority ug bahinan nimo og unsay imong makwarta, lusot ang tanan nimong mga plano ug agenda, insertion diri, insertion didto, datu kana pagkahuman sa imong termino.
Kana ang tubag kon nganong giilogan ang speakership sa Kongreso, self-interest muna, bago ang interest sa sambayanang Pilipino, susmaryosep, kanus-a pa ba ta nakahibalag og mga politiko nga unahon ang interes sa publiko, kung naa man, pipila lang.
Mao nga hangtud karon nag-ila-id kitang mga Pilipino sa tumang kalisud ug kapait sa panginabuhi tungod kay kadaghan sa atong mga politiko, pobre sa pagsulod, milyonaryo pagkatapos na sa ilang termino, mosugot kita ug sa dili, dawaton nato kay kini maoy masakit nga kamatuoran.
Dili tanan, apan kasagaran gayud.