Pro Bono

IMPORTANTI kaayo ning umaabot nga eleksiyon. Ug angay lang pangandaman sa Comelec ang hapsay nga pagpahigayon niini.

Ang ulahing report nagpadayag nga gamiton sa Comelec ang tanang 81,000 ka mga precinct count optical scan machines karong Mayo 13 nga piniliay. Gipaniguro ni Comelec chairman Sito Brillantes nga ipakatap sab nila ang mga 77,000 reserve unit sa matag polling precinct.

Unsa man kaseguro nga dili mopalpak ang mga PCOS machine? Sa miaging mock eleksiyon nasuta ang mga depekto sa machine. Ug tataw nga naabiriya ang pag-transmit sa resulta gikan sa probinsya.

Mosugot ta o dili kinahanglan gyud gamiton ang mga PCOS machines kay kon dili mobalik ta sa mano-mano nga pag-ihap sa balota. Ang gusto lang mahibaw-an sa publiko nga kon unsa gyud ka operational karon ang mga machines nga mo-function sa iyang insaktong kagamitan.

Hinaut nga dili kini masudlan og mga peke nga resulta kay sa panahon nato karon daghang imposibli nga nahimong posibli diha sa paggamit sa bag-ong mga technology. Na-hack man gani ang pinaka-secure nga computer sa Pentagon. Ang angay bantayan pag-ayo kining pag-transmit sa resulta.

Kon maminaw ta sa nagkadaiyang opinion sa mga expert sa electronics ug computer, makuyawan ta sa ilang panglantaw aning paggamit og mga electronic voting machine. Dili sila makahatag og sento-porsiento nga luwas gikan sa tanang risgo kining mga makinarya nga gipadagan sa electronics.

Aron pagwala sa duda, mas maayo mopahigayon og mas lapad nga information campaign pag-usab ang Comelec. Ilang ipasabot ang tanang seguridad sa PCOS machine. Angay masayod niini ang mga botanti aron matagbaw sila sa umaabot nga eleksiyon.

Hangtod nga dili mahatagan og tukma ug kasaligan nga impormasiyon ang katawhan, dili masalikway unya nato ang pagduda sa uban nga dunay mga mainobra sa resulta sa eleksiyon.

Ang gusto masayran sa mga botanti mao kining posibling mga abiriya sa PCOS machine ug unsay angay buhaton aron dili maapektohan ang resulta ug kon unsa ang lig-ong pamaagi sa Comelec nga ma-secure gikan sa pag-hack ang mga resulta.

Dili man unta gyud kinahanglan i-secure pag-ayo ang PCOS machine. Pero tungod aning mga tikasan nga mga politico nga hangtod karon buhi pa ug nagpadayon sa ilang hiwi nga mga lihok, mao nga kinahanglan nato panalipdan ang boto.

Ang kamatuoran ani mao nga gigamit kining PCOS machine dili aron lang mapadali ang pag-ihap sa resulta kon dili aron malikayan kining grabeng pagpanikas sa eleksiyon. Makauulaw gyud.