NIADTONG Sabado, Nobyembre 21, gisalmutan sa mga estudyante sa kolehiyo ang pagsaulog sa 6th Davao Media Freedom Day didto sa University of Mindanao (UM) Matina Campus, siyudad sa Davao.
Mitambong mao ang mga estudyante gikan sa Ateneo de Davao University (AdDU), University of Mindanao (UM), Davao Central College (DCC), University of the Immaculate Conception (UIC), Holy Cross of Davao College (HCDC) University of the Philippines (UP-Mindanao) ug Jose
Maria College (JMC).
Mga estudyante daghan og nakat-unan gikan sa mga de-kalibre nga mga mamumulong sama nila Sun.Star Davao Editor-in-chief Stella Estremera, Amalia Bandiola-Cabusao, EIC sa Mindanao Times; Agapito Joaquin Jr., Associate Editor sa Edge Davao; Trisha Corpus, Station Manager sa ABS-CBN Davao ug pipila ka mga magsusuwat sa mantalaan sa Davao.
Ang Davao Media Freedom Day hiniusang aktibidad sa mga journalists sa Davao City nga naghandom sa mangilngig nga Maguindanao massacre, unom ka tuig na ang milabay didto sa Sitio Masalay, Barangay Salman, Ampatuan, Maguindanao.
Kini nga hitabo maoy gikonsiderang usa sa mangilngig nga pagpatay sa mga mamamahayag sa kasaysayan sa kalibutan sanglit 58 ka mga tawo ang gipamatay, lakip na 32 ka sakop sa media.
Unom ka tuig na ang milabay, apan wa pa natagamtaman sa kabanay sa mga biktima ang hustisya sa kamatayon sa ilang mahal sa kinabuhi.
Ang maong hitabo maoy nakapasamot sa pagtuo natong mga yanong lungsuranon nga kung pobre ang malambigit sa krimen, dali kaayo motuyok ang ligid sa hustisya. Apan kung gamhanan ang nalambigit sa krimen, maabtan og siyam-siyam una mahukman sa korte. Ang pait pa gayud mao nga kasagaran
nila, mabasura ang kaso.
Tungod sa Davao Media Freedom Day, mahinumdoman nato ang ngilngig nga masaker sa Maguindanao nga angay paspasan korte. (SuperBalita Davao)